जामनेर तालुक्यातील देऊळगाव गुजरी येथील घटना
जामनेर (प्रतिनिधी) : येथून जवळच असलेल्या देऊळगांव-गुजरी येथील आठवडे बाजारात गेल्या अनेक दिवसापासुन चोरीचे प्रमाण वाढलेले होते. ग्रामस्थांच्या खिशातून पैसे, मोबाईल, महिलांचे दागिणे बाजारातून चोरी होत होती. दि.१० रोजी देऊळगांव गुजरी येथील आठवडे बाजार होता. या बाजारातून एका- ३० वर्षिय महिलेने एका पुरुषाच्या खिशातून नऊ हजार रुपये चोरी केल्याची घटना उघडकीस आलेली आहे. या महिलेस लोकांनी पकडून पोलीसांच्या ताब्यात दिले. नंतर तिच्याविरुद्ध गुन्हा दाखल केलेला आहे.
आठवडे बाजारात दुपारच्या सुमारास देव्हारी ता. सोयगांव येथील ५० वर्षीय नेमीचंद बापू जाधव आले होते. त्यांनी एका व्यक्तीकडून ९ हजार उसणवारीवर घेतले. हे पैसे त्यांनी पॅन्टच्या मागील खिशात ठेवले व स्वतः जवळ असणाऱ्या पैशाने भाजीपाला व इतर खरेदी करीत असतांना त्यांच्या मागच्या खिशातून एका ३० वर्षीय किरण रोहित हतागडे या महिलेने ९ हजार रुपये काढले व पसार झाली. त्यानंतर या महिलेने एकाचे ३०० रुपये, दुसऱ्याचे ६ हजार, तिसऱ्याचे ३ हजार रुपये चोरले. तेव्हा तिला तिसऱ्या व्यक्तीने रंगेहात पकडले. त्यानंतर महिलेस पोलीसांच्या ताब्यात देण्यात आले. महिलेविरुद्ध चोरीचा गुन्हा दाखल करण्यात आला आहे.
