मध्यवर्ती बँकेची रक्कम सुरक्षित ; यावल तालुक्यात घडली होती घटना
यावल (प्रतिनिधी) : तालुक्यातील फैजपूरजवळच असलेल्या आमोदे येथील श्रीराम मंदिराच्या वरच्या मजल्यावर असलेल्या जेडीसीसी बँकेच्या शाखेत शॉर्टसर्किटमुळे आग लागली. मंदिराचा उत्तरेकडील अर्धा भाग जळून खाक झाला आहे. आगीमुळे बँकेचे फर्निचर, कागदपत्र सर्व जळून खाक झाले असले तरी रोकड मात्र सुरक्षित असल्याचे सांगण्यात आले. या आगीत श्रीराम मंदिरातील ४८ लाख ८५ हजार ९०० रुपयांच्या मंदिरातील वस्तू तर ७ लाख ६२ हजार रुपये किंमतीचे जेडीसीसी बँकेचे डेड स्टॉक व संगणक आदी जळून खाक झाले.मात्र डेटा ऑनलाईन असल्याने सुरक्षित आहे.
ही आग गुरुवारी २ मे रोजी रात्री साडेदहाच्या सुमारास लागली. रात्री तीन वाजेच्या सुमारास ८ बंबांद्वारे आगीवर नियंत्रण मिळवता आले. श्रीराम मंदिरावर असलेला झेंडा आणि गाभार्यात विराजमान श्रीराम, लक्ष्मण, सीतामाईसह इतर देवतांना आगीची सुदैवाने झळ बसली नाही. पुरातन, तीन मजली सागवानी लाकडाचा ढाचा असलेले मजबूत बांधकामाचे मंदिर असल्याने उत्तरेकडील व वरील दोन मजल्यांचे पूर्णपणे नुकसान झाले आहे. मंदिराच्या दक्षिणेकडील तळमजल्याचा काही भाग सुरक्षित आहे. गुरुवारी रात्री आगीची माहिती जसजशी परिसरात पसरली तसतसे फैजपूर, सावदा, भुसावळ, यावल, रावेर येथील अग्निशमन बंबानी प्रयत्न करून आग आटोक्यात आणली.
फैजपूर, सावदा, हिंगोणा, न्हावी, बामणोद, पाडळसा, भालोद, भुसावळ येथील राजकीय-सामाजिक पदाधिकार्यांसह असंख्य कार्यकर्ते आमोद्यात धावून आले. शासकीय कर्मचारी तलाठी, ग्रामसेवक, वीज वितरण कंपनीचे कर्मचार्यांचा स्थानिक रहिवास नसल्याने नागरिकांचा संताप झाला. बँकेचे कामकाज ऑनलाईन असल्याने संपूर्ण डाटा सुरक्षित असल्याने खातेदारांनी चिंता करू नये तसेच बँक लॉकर तळमजल्यावर असल्याने रक्कम सुरक्षित असल्याचे बँकेचे शाखाधिकारी यांनी माहिती दिली आहे.