जळगावात रायसोनी नगर येथील घटना
जळगाव ( प्रतिनिधी) – येथील रायसोनी नगर परिसरात राहत असलेल्या प्रौढाने आजारपणाला कंटाळून राहत्या घरी गळफास घेऊन आत्महत्या केल्याची धक्कादायक घटना मंगळवारी दि. १७ रोजी पहाटे ४ वाजेनंतर घडली आहे. याप्रकरणी रामानंद नगर पोलीस स्टेशनला अकस्मात मृत्यूची नोंद करण्यात आली आहे.
विलास श्रावण आंधळे (वय ६३) असे मयत इसमाचे नाव आहे. ते पत्नी, १ मुलगा, सून, १ मुलगी यांच्यासह राहत होते. मुलगा विशाल हा महावितरण कंपनीत सहायक अभियंता आहे. गेल्या ७ वर्षांपासून ते दीर्घ आजाराने ग्रासले होते. या आजारपणावर त्यांनी अनेक रुग्णालयात उपचार केले. मात्र त्यांना दिलासा मिळाला नव्हता. त्यामुळे ते नैराश्यात होते. मंगळवारी पहाटे कुटुंबीय झोपेत असताना त्यांनी राहत्या घरी गळफास लावून घेत आत्महत्या केली.
कुटुंबियांना सकाळी कळताच त्यांनी तात्काळ शासकीय वैद्यकीय महाविद्यालय व रुग्णालयात दाखल केले असता तेथे वैद्यकीय अधिकाऱ्यांनी तपासून मयत घोषित केले. यावेळी कुटुंबीयांनी एकच आक्रोश केला. दरम्यान, घटनेमुळे कुटुंबियांवर शोककळा पसरली आहे. रामानंद नगर पोलीस स्टेशनला अकस्मात मृत्यूची नोंद करण्यात आली आहे.
