जळगावात छत्रपती शिवाजी नगरात घडली घटना
जळगाव ( प्रतिनिधी ) – छत्रपती शिवाजी नगरातील शिवाजी चौकात रविवारी ३१ मार्च रोजी मध्यरात्रीनंतर एचडीएफसी एटीएम मशीनच्या गाळ्यास आग लागली होती. या घटनेत एक लाख ५१ हजारांचे नुकसान झाले. एटीएम शॉपमध्ये इलेक्ट्रिक शॉर्ट सर्किटमुळे आग लागल्याचा अंदाज वर्तविला गेला आहे.
हा प्रकार लक्षात येताच महापालिकेच्या अग्निशमन विभागाला माहिती देण्यात आली. त्यानुसार अग्निशमन दलाचे पथक अग्निशामक बंबासह घटनास्थळी दाखल झाले. पाण्याचा फवारा मारून ही आग विझविली होती. घटनास्थळी शहर पोलीस स्टेशनचे पोलीस निरीक्षक अनिल भवारी यांच्यासह कर्मचारी हजर होते. आगीत तीन बॅटरी, डिव्हीआर बॉक्स तसेच इलेक्ट्रिक सामान जळून नुकसान झाले.
या प्रकरणी ललित दामू घुले (वय ३६, रा. गणराय विहार, शिवपूर-कन्हाळा रोड, भुसावळ) यांच्या तक्रारीनुसार शहर पोलीस ठाण्यात अकस्मात आगीची नोंद करण्यात आली. हवालदार दीपक शिरसाठ तपास करीत आहेत.
