अखेर गुलाबरावांकडे जळगावचे  पालकमंत्रीपद, महाजनांना नाशिक तर सावकारे यांना भंडारा

जळगाव  प्रतिनिधी) : अखेर रखडलेल्या पालकमंत्र्यांच्या नियुक्ती जाहीर झाल्या आहेत. अपेक्षाप्रमाणे जळगावचे पालकमंत्री गुलाबराव पाटील यांच्याकडे गेले असून गिरीश महाजन यांना नाशिक मिळाले आहे. तर पहिल्यांदाच कॅबिनेट मंत्री झालेले संजय सावकारे यांना भंडारा जिल्ह्याची जबाबदारी सोपवण्यात आली आहे.

विधानसभा निवडणुकीचा निकाल आणि यानंतर मंत्रीपदांचा शपथविधी होऊन देखील अद्याप पालकमंत्री पदांची यादी जाहीर झालेली नव्हती. यातच जळगाव जिल्ह्याच्या पालकमंत्री बदाबाबत मोठी उत्सुकता निर्माण झाली होती. गेल्या अनेक वर्षांपासून पालकमंत्री पदाची धुरा ही गुलाबराव पाटील यांच्याकडे असली तरी आता भारतीय जनता पक्षातर्फे याचा दावा करण्यात आलेला होता. यामुळे पालकमंत्री पद नेमके कोणाला मिळणार याबाबत मोठीच उत्सुकता निर्माण झाली होती. या पार्श्वभूमीवर आज राज्य सरकारने पालकमंत्र्यांची यादी जाहीर केली आहे.

या यादीनुसार जळगाव जिल्ह्याचे पालकमंत्री म्हणून राज्याचे पाणीपुरवठा व स्वच्छता मंत्री नामदार गुलाबराव पाटील यांची नियुक्ती करण्यात आलेली आहे. यामुळे आता पाच वर्षांपेक्षा पुढील कालावधीत देखील गुलाबराव पाटील यांच्याकडेच जळगाव जिल्ह्याची धुरा असेल हे आता स्पष्ट झालेले आहे. दरम्यान जिल्ह्यातील मातब्बर नेते तथा भारतीय जनता पक्षाचे ज्येष्ठ मंत्री गिरीश भाऊ महाजन यांच्याकडे नाशिक जिल्ह्याची महत्त्वाची धुरा सोपवण्यात आलेली आहे.तर ना. संजय सावकारे यांच्याकडे भंडारा जिल्ह्याची धुरा सोपवण्यात आली आहे.