चाळीसगाव तालुक्यातील पिंपळगाव येथील घटना
जळगाव (प्रतिनिधी) :- चाळीसगाव तालुक्यातील पिंपळगाव येथे एका मजुराच्या घरी चोरी केल्याप्रकरणी दोन संशयित आरोपींना चाळीसगाव ग्रामीण पोलिसांनी अटक केली आहे. त्यांच्याकडून मुद्देमाल जप्त करण्यात आला आहे.
मंगेश राजेंद्र शेलार (वय ३९) आणि निलेश अनिल मोरे (वय २९, पिंपळगाव, ता.चाळीसगाव) अशी अटकेतील संशयित आरोपींची नावे आहेत. पिंपळगाव येथील सुनील फकिरा काकडे यांनी मोलमजुरी करुन जमवलेली १ लाख २० हजाराची रक्कम घरातील कोठीत ठेवली होती. सुनील काकडे हे पत्नीसह २ रोजी मोलमजुरी करण्यासाठी घरातून बाहेर गेल्यानंतर त्यांच्या घरातील कोठीत ठेवलेली रक्कम चोरी झाली होती. घराच्या खिडकीची ग्रील तोडून आत प्रवेश करुन कुणीतरी चोरी केल्याचा प्रकार उघडकीस आल्यानंतर चाळीसगाव ग्रामीण पोलिस स्टेशनला गुन्हा दाखल करण्यात आला होता.
तपासाअंती या गुन्ह्यातील संशयीत मंगेश राजेंद्र शेलार यास ताब्यात घेतल्यानंतर चौकशीत त्याने हा गुन्हा निलेश मोरे याच्या मदतीने केल्याचे कबुल करताच दोघांना अटक करण्यात आली. त्यांच्या ताब्यातून १ लाख १३ हजारांची रोकड जप्त करण्यात आली. चाळीसगाव ग्रामीण पोलीस स्टेशनचे पोलीस निरीक्षक राहुलकुमार पवार यांच्या नेतृत्वात ही कारवाई करण्यात आली.
