नाशिक येथील घटना, यावल तालुक्यात किनगाव येथे शोककळा
यावल (प्रतिनिधी) :- तालुक्यातील किनगाव येथे राहत असलेल्या तरुणाचा दि.१ जानेवारी रोजी नाशिक शहरातील सातपूरजवळ कामाला असलेल्या कंपनीतून घरी परत येत असतांना कारने त्याच्या दुचाकीला दिलेल्या भीषण धडकेत अपघात होऊन तरुण गंभीर जखमी झाला होता. दोन दिवसांपासून त्याच्यावर नाशिक येथे खासगी रूग्णालयात उपचार सुरू होते. दि.४ रोजी त्याची मृत्युशी सुरू असलेली झुंज अखेर अपयशी ठरली. याप्रकरणी संबंधित पोलीस स्टेशनला घटनेची नोंद करण्यात आली आहे.
अविनाश अशोक पवार (वय २२, रा. किनगाव ता. यावल) असे मयत तरुणाचे नाव आहे. त्याचे वडील वारल्यानंतर त्याच्यासह मोठ्या भावावर घराची जबाबदारी होती. त्याच्या पश्चात आई, एक अविवाहित मोठा भाऊ,असा परीवार आहे. अविनाश पवार हा तरुण आपल्या मित्रांसोबत गेल्या एक महिन्यापूर्वीच नाशिक येथे एका खासगी कंपनीत कामानिमित्त गेला होता. नववर्षाच्या पहिल्याच दिवशी दि. १ जानेवारी रोजी सायंकाळी आपल्या मित्रांसोबत कामावरुन घरी खोलीवर परत येत असताना एका चारचाकी वाहनाने त्यांच्या मोटरसायकलला जबर धडक दिली होती. यात मित्र व अविनाश दोन्ही जण जबर जखमी झाले होते. यात आज अविनाश पवार याची गेल्या दोन दिवसांपासून सुरू असलेली मृत्युशी झुंज अखेर अपयशी ठरली. यावेळी कुटुंबीयांनी मन हेलावणारा आक्रोश केला. घटनेमुळे किनगाव येथे शोककळा पसरली असून हळहळ व्यक्त करण्यात येत आहे.
