धार्मिक विधी झाल्यानंतरच वस्त्रोद्योग खात्याचा स्वीकारला पदभार
मुंबई (वृत्तसेवा) :- राज्याचे वस्त्रोद्योग मंत्री तथा भाजपचे जळगाव जिल्ह्यातील भुसावळ विधानसभा चे आमदार संजय सावकारे यांनी मंगळवारी मंत्रालयातील शासकीय दालनात विधिवत पूजापाठ करून मंत्रीपदाचा कार्यभार स्वीकारला. शासकीय दालनामध्ये पूजा केल्यानंतरच त्यांनी मंत्रीपदाचे आसन ग्रहण केले. तर दुसरीकडे राज्य शासनाच्या २०१७ च्या परिपत्रकानुसार शासकीय कार्यालयात कुठल्याही धर्माच्या पूजाविधीला बंदी असताना मंत्री सावकारे यांनी नियमांचे उल्लंघन केल्याचे उघड झाले आहे.
जळगाव जिल्ह्यातील भुसावळचे आमदार संजय सावकारे सलग तिसऱ्यांदा भाजपकडून तर मतदारसंघात चौथ्यांदा विजयी झाले आहेत. २००९ ते १४ या काळात राष्ट्रवादीत असताना राज्यमंत्रीपद व जळगावचे पालकमंत्रीपद सांभाळलेल्या सावकारे यांना यंदा भाजपने कॅबिनेटमंत्रीपदी बढती दिली आहे. चार दिवसांपूर्वी झालेल्या खातेवाटपात त्यांच्याकडे वस्त्रोद्योग खाते आले आहे. गेले दोन दिवस मतदारसंघात जोरदार आदर सत्कार झाल्यानंतर सावकारे मंगळवारी मंत्रालयात विभागाची सूत्रे स्वीकारण्यासाठी आले. मात्र, त्यापूर्वी त्यांनी मंत्रालयातील आपल्या शासकीय दालनात विधिवत पूजा घातली. शासकीय कार्यालयात अशा पद्धतीने पूजापाठाची परवानगी नसतानाही सावकारे यांनी ती केल्याने मंत्रालयात दिवसभर त्याचीच चर्चा होती.
वस्त्रोद्योग मंत्रीपदाचा कार्यभार स्वीकारल्यानंतर सावकारे यांनी विभागाची आढावा बैठक घेतली. या बैठकीस वस्त्रोद्योग विभागाचे सचिव वीरेंद्र सिंह, वस्त्रोद्योग आयुक्त अविश्यांत पंडा तसेच विभागातील वरिष्ठ अधिकारी उपस्थित होते. सचिव सिंह यांनी विभागातर्फे राबविण्यात येत असलेल्या विविध योजनांची सद्यस्थिती व माहितीचे सादरीकरण केले.
महाराष्ट्र शासनाच्या ४ जानेवारी २०१७ च्या परिपत्रकानुसार महाराष्ट्रातील सर्व सरकारी व निमसरकारी कार्यालये, शिक्षण संस्थांमध्ये आणि परिसरात कोणत्याही प्रकारचा धार्मिक विधी, पूजा (कोणत्याही धर्माचा) करण्यास मनाई असून, सरकारी आणि निमसरकारी कार्यालयांमध्ये देवी-देवतांच्या प्रतिमांनाही बंदी आहे. भारतीय संविधानात जनतेला धर्मपालनाचा अधिकार असला आणि शासनाने त्या स्वातंत्र्याचे संरक्षण करणे अभिप्रेत असले, तरी शासनाला स्वतः चा धर्म नसेल, असे म्हटले आहे.
त्यानुसार, राज्य शासनाकडून भारतीय संविधानाच्या धर्मनिरपेक्षतेच्या मूलभूत तत्त्वाला अनुसरून परिपत्रक काढण्यात आले आहे. जुलै २०२२ मध्ये एकनाथ शिंदे यांनी मुख्यमंत्रीपदाची सूत्रे हाती घेण्यापूर्वी मुख्यमंत्री कार्यालयात सत्यनारायणाची पूजा केली होती. या धार्मिक कृत्याच्या विरोधात राज्यपालांकडे तक्रार करण्यात आली होती. मुख्यमंत्री कार्यालयाकडून संविधानातील धर्मनिरपेक्षतेच्या मूलभूत तत्त्वाची पायमल्ली झाल्याचे तक्रारीत म्हटले होते. आता सावकारे यांच्याकडूनही तसेच उल्लंघन झाले आहे.
