चोपडा बसस्थानकातील घटना
चोपडा ( प्रतिनिधी) – गावाकडे आलेली महिला नातेवाईकांकडे पिंप्री ता. धरणगाव येथे जाण्यासाठी निघाली होती. गर्दीत बसमध्ये चढत असताना महिलेच्या गळ्यात असलेली १८ ग्रॅम सोन्याची मंगलपोत अज्ञात चोरट्याने लंपास केल्याची घटना रविवारी दुपारी १ वाजता चोपडा बसस्थानकावर घडली. याप्रकरणी चोपडा शहर पोलीस स्टेशनला गुन्हा दाखल करण्यात आला आहे.
वढोदा ता. चोपडा येथील मूळ रहिवाशी व ह. मु. कल्याण येथील असलेल्या मंगला नामदेव पाटील (वय ५०) या मुलगा जितेंद्र पाटील सोबत दि. २० डिसेंबर रोजी लग्नासाठी वढोदा येथे आल्या होत्या. मुलगा लग्न आटोपून एकटा कल्याण येथे निघून गेला. त्यानंतर मंगला पाटील या दि. २२ डिसेंबर रोजी रविवारी नातेवाईकांकडे पिंप्री ता. धरणगाव येथे जाण्यासाठी बभळाज ता. शिरपूर येथून एसटी बसमध्ये चोपडा बसस्थानकावर पोहोचल्या. त्याठिकाणी प्लॅटफार्म क्रमांक ३ वर धरणगावकडे जाण्यासाठी बसची वाट पाहत बसल्या होत्या.
रविवारी दुपारी १२:४५ वाजता धरणगावकडे जाणारी जळगाव बस लागली. रविवारी लग्नाची तिथी असल्याने बसस्थानकावर मोठी गर्दी होती. यावेळी गर्दीत बसमध्ये चढत असताना अज्ञाताने मंगलपोत लांबवली. बसमध्ये चढल्यानंतर बघितले असता गळ्यात सोन्याची मंगळपोत दिसून आली नाही. त्यामुळे त्यांनी बसमधील प्रवाशांसह चालक, वाहकांकडे तक्रार केली. यावेळी बसस्थानकावरील पोलिसांसह प्रवाशांनी चौकशी केली; परंतु सोन्याची मंगलपोत आढळून आली नाही.
शेवटी मंगला पाटील यांनी वढोदा येथे पती नामदेव हिरामण पाटील यांना घटनेची माहिती दिली. त्यानंतर नातेवाईकांसह आल्यावर बसस्थानकावर चौकशी केली. परंतु मंगलपोत मिळून आली नाही. त्यांच्या फिर्यादीवरून शहर पोलिस स्टेशनला गुन्हा दाखल करण्यात आला आहे.
