धरणगाव तालुक्यातील चांदसर येथील घटना
जळगाव (प्रतिनिधी) :- धरणगाव तालुक्यातील चांदसर येथे गिरणा नदीतून अवैध वाळू उपसा आणि वाहतूक रोखण्यासाठी गेलेल्या महसूल विभागाच्या पथकावर वाळू माफियांनी प्राणघातक हल्ला केला. या हल्ल्यात तलाठी दत्तात्रय पाटील यांना गंभीर जखमा झाल्या असून त्यांना जळगाव येथील दवाखान्यात दाखल करण्यात आले आहे.
गिरणा नदीतून वाळू उपसा करण्यावर बंदी असतानाही वाळूमाफियांनी जिल्हा प्रशासनाच्या निर्बंधांना चांगलेच आव्हान दिले आहे. दि. १९ डिसेंबर रोजी रात्री चांदसर बु ता. धरणगाव येथील नदी पात्रात वाळू वाहतूक करणारे दोन ट्रॅक्टर पकडले गेले, परंतु महसूल विभागाच्या पथकावर अचानक हल्ला झाला. पथकाच्या सदस्यांना वाळू माफियांनी जबर मारहाण केली, ज्यामुळे तलाठी दत्तात्रय पाटील गंभीर जखमी झाले. त्यांना जळगाव येथील दवाखान्यात दाखल करण्यात आले.
या हल्ल्यामुळे प्रशासनात खळबळ उडाली असून, स्थानिक तहसीलदार आणि पोलीस अधिकाऱ्यांनी घटनास्थळी पोहोचून अधिक चौकशी सुरू केली आहे. दरम्यान, वाळू माफियांच्या अवैध कारवायांच्या विरोधात प्रशासन अधिक कठोर पावले उचलणार असून प्रशासनाने अधिक सुरक्षितता आणि त्वरित उपाययोजना करण्यासाठी सूचना देण्यात आल्या आहेत, अशी माहिती जिल्हाधिकारी आयुष प्रसाद यांनी दिली आहे.
