एमआयडीसी पोलीस स्टेशनची कारवाई
जळगाव (प्रतिनिधी) :- पुणे येथून जळगावात येणाऱ्या वाहनातून ५ कोटी ५९ लाख ६१ हजाराचे सोने-चांदी जप्त करण्यात आले. शुक्रवारी रात्री रेमंड चौकात स्थानिक गुन्हे शाखा व एमआयडीसी पोलिसांनी ही कारवाई केली. जळगाव शहरातील सुवर्ण व्यावसायिकासह तीन सराफ व्यावसायिकांचे हे सोने-चांदी असल्याचे सांगण्यात येत आहे. पोलिसांनी संपूर्ण प्रक्रिया करून हा साठा कोषागार कार्यालयात पाठविला आहे.
विधानसभा निवडणुकीच्या अनुषंगाने सध्या तपासणी मोहीम राबविण्यात येत आहे. शुक्रवारी दिवसभरात जळगाव शहरात २३ लाखांहून अधिक रक्कम जप्त करण्यात आली. त्या पाठोपाठ रात्री रेमंड चौकात स्थानिक गुन्हे शाखा व एमआयडीसी पोलिस नाकाबंदी करीत असताना पुणे येथून येणारे एक वाहन (क्र. एमएच १२. यएम ५६२०) अडविण्यात आले. पोलिस पथकाने वाहनाची तपासणी केली असता त्यात जवळपास ४ किलो सोने व ३४ किलो चांदी आढळली.
या विषयी उपविभागीय पोलिस अधिकारी संदीप गावित यांना माहिती देण्यात आली व त्यांच्या उपस्थितीत पंचनामा करण्यात आला. इन कॅमेरा सर्व प्रक्रिया करण्यात आली. हे वाहन पुणे येथून सोने-चांदी घेऊन जळगावात येत होते. जळगावातील सुवर्ण व्यावसायिकासह अन्य २ असे एकूण ३ सुवर्ण व्यावसायिकांचे हे सोने-चांदी असल्याचे सांगण्यात येत आहे. जप्त केलेल्या मालाचे कागदपत्र वाहन चालकाकडे होते. मात्र त्यात इतर आवश्यक कागदपत्रे नसल्याने हा साठा जप्त करण्यात आला आहे.
