यावल तालुक्यातील घटना
यावल (प्रतिनिधी) :- तालुक्यातील कोळवद येथे वीजचोरी करणाऱ्या सहा जणांवर गुन्हा दाखल करण्यात आला आहे. कोळवद येथे महावितरण कंपनीच्या ग्रामीण कक्षाचे सहायक अभियंता दीपक चौधरी यांच्या नेतृत्वात वीजचोरी विरुद्ध धडक मोहीम राबविण्यात आली होती.
यामध्ये नथ्थू फत्तू तडवी, संजय रवींद्र सूर्यवंशी, सुभाष कमलाकर फेगडे, रमजान फकीरा तडवी, महारू उस्मान तडवी व भास्कर आत्माराम पाटील हे सहा जण वीजचोरी करताना आढळून आले होते. या सहा जणांनी मागील एक वर्षापासून १ हजार २८६ युनिट वीजचोरी केल्याचे निदर्शनास आले होते. तेव्हा त्यांना २३ हजार ०७७ रुपये व तडजोड आकार एकूण २२ हजार रुपये अशी आकारणी करून दंड भरण्याची नोटीस बजविण्यात आली होती.
मात्र, यात सहा जणांनी वेळेत दंड भरला नाही. म्हणून यावल पोलिस ठाण्यात सहायक अभियंता दीपक चौधरी यांच्या फिर्यादीवरून वीजचोरीचा गुन्हा दाखल करण्यात आला आहे. पुढील तपास पोलिस निरीक्षक प्रदीप ठाकूर यांच्या मार्गदर्शनाखाली पोलिस नाईक किशोर परदेशी करीत आहे.
