सोयगाव तालुक्यातील निंबायती येथील घटना
जळगाव (प्रतिनिधी) : शेतातून जनावरांचा चारा व शेतीमाल बैलगाडीने घरी आणत असताना सोयगाव तालुक्यातील निंबायती येथे बैलगाडी पलटी झाली. यात दबलेल्या शेतकऱ्याचा मंगळवारी दि. १५ रोजी रात्री ११ वाजता उपचारादरम्यान मृत्यू झाला.
अशोक शामराव शिंदे (वय ५५, रा. निंबायती ता. सोयगाव) असे मृत झालेल्या शेतकऱ्याचे नाव आहे. त्यांच्या पश्चात आई, वडील, पत्नी, दोन मुले एक मुलगी असा परिवार आहे. निंबायती शिवारात असलेल्या त्यांच्या शेतातून हा शेतकरी जनावरांना चारा व शेतीमाल बैलगाडीमध्ये भरून दि. ९ बुधवार रोजी सायंकाळी घरी येत असताना त्यांची बैलगाडी पलटी झाली. या घटनेत शेतकरी अशोक शामराव शिंदे हे बैलगाडी खाली दबून गंभीर जखमी झाले होते. दरम्यान त्यांना तातडीने छत्रपती संभाजीनगर येथील घाटी रुग्णालयात उपचारासाठी दाखल करण्यात आले होते. परंतु मंगळवारी दि. १५ रोजी रात्री ११ वाजता त्यांचा उपचारादरम्यान मृत्यू झाला. त्यांच्यावर घाटी रुग्णालयात शवविच्छेदन करण्यात आले.
