जळगाव एलसीबीची कारवाई, चांदसर येथे घडली होती घटना
जळगाव (प्रतिनिधी) : गिरणा नदीच्या पात्रातून वाळूचा अवैध उपसा करीत असताना कोतवालाने फोटो काढले होते. त्यावर तेथील वाळूमाफियाने हवेत गोळीबार करून दहशत पसरवली होती. ही घटना चांदसर ता. धरणगाव येथे मंगळवारी दि. १७ सप्टेंबर रोजी दुपारी ४ वाजण्याच्या सुमारास घडली होती. याप्रकरणी आता स्थानिक गुन्हे शाखेने गोळीबार करणाऱ्या संशयित आरोपीला अटक केली आहे.
संशयित आरोपी निवृत्ती उर्फ गोपाल गजानन सोनवणे (कोळी, वय ३२, रा. वाकटुकी, ता. धरणगाव), हा गुन्हा घडल्यापासून फरार होता. चांदसर गावातील नदीपात्रातून वाळू उपसा होत होता. (केसीएन)तो रोखण्यासाठी गावाबाहेर चाऱ्या खोदून रस्ता बंद करण्यात आला आहे. त्यामुळे अवैध वाळू उपसा बंद होता. अवैध वाळू उपसा करण्यासाठी वाकटुकी येथील काहीजण चाऱ्या बुजवत होते. याबाबत कोतवाल अमोल गुलाब मालचे यांना समजले. त्यांनी तेथे जाऊन त्यांना त्याचा जाब विचारला. याचा राग येऊन वाळू माफियांनी शिवीगाळ करून जिवे मारण्याची धमकी दिली. याच वेळी गोपाल कोळी यानी त्यांच्याजवळील पिस्तूल काढून हवेत गोळीबार केला. यावेळी तेथे एकच खळबळ उडाली.
तर गावात त्याचा आवाज झाल्याने तेथेही धावपळ उडाली. हवेत गोळीबार केल्यानंतर ते पळून गेले. माहिती कळताच पाळधी दुरक्षेत्राचे पोलिस गावात पोहोचले. याबाबत पाळधी दुरक्षेत्र पोलीस स्टेशनला गुन्हा दाखल केला आहे.(केसीएन) संशयित आरोपी योगेश ईश्वर कोळी, आबा ईश्वर कोळी, गणेश सोमा कोळी, मोहन गोविंदा कोळी, कल्पेश महेश पाटील, राहुल भीमराव कोळी, राहुल दिलीप कोळी (सर्व रा. चांदसर, ता. धरणगाव) तसेच गोपाल कोळी, दीपक कोळी (दोन्ही रा. वाकटुकी, ता. धरणगाव) अशी गुन्हा दाखल झालेल्यांची नावे आहेत. कोतवाल अमोल मालचे यांनी दिलेल्या फिर्यादीवरून वरील व्यक्तींविरुद्ध गुन्हा दाखल करण्यात आला आहे.
या प्रकरणी पोलीस अधीक्षक महेश्वर रेड्डी यांनी संशयित आरोपीला ताब्यात घेण्यासाठी आदेश दिल्यानंतर वरिष्ठ पोलीस निरीक्षक बबन आव्हाड यांच्या नेतृत्वाखालील पथकाने ही कारवाई केली. गोपनीय माहितीच्या आधारे, धरणगाव तालुक्यातील पिंप्री खुर्द येथे आठवडे बाजारात संशयित फिरत असल्याचे कळताच पथकाने सापळा रचला व ताब्यात घेतले. (केसीएन)चौकशीदरम्यान संशयिताने गुन्ह्याची कबुली दिली. त्याच्याकडून गावठी कटटा, मॅगझीनसह २५,००० रुपयांचा मुद्देमाल हस्तगत करण्यात आला आहे. सदर संशयित आरोपीला पुढील तपासासाठी धरणगाव पोलीस स्टेशनच्या ताब्यात देण्यात आले आहे.
