विद्यार्थ्यांना सेवेत येण्याच्या सूचना, जळगावच्या शासकीय वैद्यकीय महाविद्यालयातील घटना
जळगाव (प्रतिनिधी) : येथील शासकीय वैद्यकीय महाविद्यालय व रुग्णालयात रॅगिंगप्रकरणी दाखल तक्रारींवर चौकशी समिती नियुक्त करण्यात आली आहे. या समितीचे कामकाज आता अंतिम टप्प्यात असून अहवाल तयार करण्याचे काम सुरु आहे. तक्रारदार विद्यार्थ्यांना सेवा देण्यासाठी समितीने सूचना दिल्या आहेत.
रुग्णालयातील स्त्री रोग व प्रसूतीशास्त्र विभागातील कनिष्ठ निवासी १ चे २ मुले व ४ मुली अशा सहा जणांनी त्यांची रॅगिंग झाल्याची तक्रार राष्ट्रीय आयुर्विज्ञान आयोगाकडे ऑनलाईन केली होती. याप्रकरणी कनिष्ठ निवासी २ असणाऱ्या तिघा मुलींनीं रॅगिंग केली असल्याचा त्यांचा आरोप होता.(केसीएन)याबाबत आयोगाने मेल पाठविण्यानंतर अधिष्ठाता डॉ. गिरीश ठाकूर यांनी उप अधिष्ठाता डॉ. गिरीश ठाकरे यांच्या अध्यक्षतेखाली चौकशी समिती नेमली होती. यात तहसीलदार, पोलीस निरीक्षक, जिल्हा माहिती अधिकारी यांच्यासह १५ जणांचा समावेश होता. या समितीने गेल्या ५ दिवसांपासून चौकशी करीत ६५ जणांचे जबाब नोंदवून घेतले.
यात परिचारिका, डॉक्टर्स, कर्मचारी यांचा समावेश होता. समितीचे कामकाज आता संपले असून अहवाल तयार करण्याचे काम सुरु होते. हा अहवाल राष्ट्रीय आयुर्विज्ञान आयोग व महाराष्ट्र आरोग्य विज्ञान विद्यापीठ यांना पाठविला जाणार आहे. (केसीएन)त्यानंतर कुणावर काय कारवाई होते हे पुढील दिवसात समजू शकणार आहे. तक्रारदार ६ जणांनी चौकशी होईपर्यंत रुग्णालयातील रुग्णसेवा थांबविली होती. मात्र आता त्यांचे सोमवारी जबाब नोंदविल्यानंतर त्यांना आश्वस्त करण्यात आले आहेत.
तुम्ही रुग्णसेवा सुरु करा. कुठल्याही दबावात राहू नका. समिती तुमच्यासोबत आहे असे तक्रारदारांना सांगण्यात आले आहे. मात्र विद्यार्थ्यांनी रुग्णसेवा सुरु केली कि नाही याबाबत माहिती मिळू शकली नाही. दरम्यान, शाब्दिक त्रास देणे, कामाचा अतिरिक्त बोजा टाकणे, वेळेवर जेऊ न देणे, वेळेवर झोपू न देणे, वॉर्डात रुग्ण व नातेवाइकांसमोर अयोग्य भाषेत बोलणे अशा विविध स्वरूपात त्रास दिल्याबाबत तक्रार या ६ तक्रारदार निवासी विद्यार्थ्यांनी दिली असल्याची माहिती समितीने दिली आहे.
