चोपडा उपजिल्हा रुग्णालयाच्या आवारातील घटना
जळगाव (प्रतिनिधी) :- पार्किंग केलेली १०८ रुग्णवाहिका अचानक पेटली. त्यातील साहित्य जळून खाक झाले. बुधवार दि. २५ रोजी पहाटे चार ते साडे चार वाजेच्या सुमारास ही घटना चोपडा उपजिल्हा रुग्णालयाच्या आवारात घडली.
१०८ क्रमांकाची शासकीय रुग्णवाहिका (क्रमांक एमएच १४ सीएल ०८२८) ही चोपडा ग्रामीण रुग्णालयात पार्किंग केली होती. पहाटे रुग्णवाहिकेच्या पुढच्या बाजुला इंजिनकडून अचानक आग लागून वाहन पेटले. काही अवधीत ही रुग्णवाहिका आगीच्या चपाट्यात येऊन साहित्य जळून खाक झाले. या प्रकरणी चालक हिंमत नवल धनगर (वय ४५, रा. भावेर, ता. शिरपूर) यांच्या तक्रारीनुसार चोपडा शहर पोलीस ठाण्यात अकस्मात आगीची नोंद करण्यात आली. तपास पोहेकॉ दीपक वसावे हे करीत आहेत.
