जळगाव शहरातील जिल्हा उद्योग केंद्रसमोरील घटना
जळगाव (प्रतिनिधी) : एरंडोलहून जळगावला घरी येत असताना महामार्गावर असलेल्या खड्ड्याचा अंदाज न आल्याने दुचाकी घसरून एक डॉक्टर गंभीर जखमी झाले आहेत त्यांना खाजगी रुग्णालयात उपचारासाठी दाखल करण्यात आल्याची माहिती मिळाली आहे.
डॉ. सुहास भालचंद्र नेमाडे (वय ५६, रा. पत्रकार कॉलनी, जळगाव) असे गंभीर जखमी व्यक्तीचे नाव आहे. जिल्हा पेठ पोलिसांनी त्यांना रुग्णालयात दाखल केले आहे. हा अपघात सोमवारी रात्री दहा वाजेच्या सुमारास महामार्गावर जिल्हा उद्योग केंद्रसमोर झाला. सुहास नेमाडे हे सोमवारी रात्री दुचाकीने एरंडोल येथून जळगावला येत होते.
महामार्गावर असलेल्या अंधारात जिल्हा उद्योग केंद्र समोरील खड्ड्यांचा अंदाज न आल्याने दुचाकी घसरली व नेमाडे यांच्या डोक्याला जबर मार लागला. जिल्हा पेठ पोलिसांना माहिती मिळताच ते घटनास्थळी दाखल झाले. त्यांनी गंभीर जखमीला रुग्णवाहिकेतून शासकीय रुग्णालयात हलविले. नंतर त्यांना खाजगी रुग्णालयात नेण्यात आल्याची माहिती मिळाली आहे.
