राजकीय सर्कस : नाथाभाऊंच्या बाबतीत चाललेय काय ?
जळगाव (विशेष प्रतिनिधी) : जिल्ह्यातील विधानपरिषदेचे आमदार व माजी मंत्री एकनाथराव खडसे यांनी त्यांच्या वाढदिवसाच्या दिवशी सोमवारी दि. २ सप्टेंबर रोजी प्रसारमाध्यमांशी संवाद साधला. यावेळी त्यांची सद्याची राजकीय स्थिती विशद केली. भाजपमध्ये प्रवेश केला आहे मात्र तो पक्षाने जाहीर केला नाही. तर राष्ट्रवादी काँग्रेस पक्षाचा राजीनामा दिला आहे मात्र तो अध्यक्ष शरद पवार यांनी स्वीकारलेला नाही. त्यामुळे अजून काही दिवस भाजपकडून वाट बघेल आणि मूळ राष्ट्रवादी पक्षात पुन्हा कामाला लागेल, अशी माहिती आ. एकनाथराव खडसे यांनी माध्यमांना दिली. मात्र नाथाभाऊंच्या बाबतीत नेमके चाललेय काय ? असा प्रश्न निर्माण झाला आहे.
आमदार एकनाथ खडसे यांच्या वाढदिवसानिमित्त जळगावमध्ये बॅनर झळकले. या बॅनरवर शरद पवारांसह राष्ट्रवादी काँग्रेसच्या पदाधिकाऱ्यांचे फोटो होते. त्यामुळे खडसे कोणत्या पक्षात आहेत ? असा प्रश्न उपस्थित झाला. याबाबत आ. खडसेंनी माध्यमांना माहिती दिली. (केपीएन)एकनाथ खडसे म्हणाले, “जे.पी. नड्डा, विनोद तावडे, खा. रक्षा खडसे यांच्या उपस्थितीमध्ये माझा भाजपमध्ये प्रवेश करण्यात आला. पण, त्याला खाली विरोध झाल्याने तो जाहीर होऊ शकला नाही. त्यामुळे आता भाजपमध्ये राहणे उचित होणार नाही”, असा धक्कादायक दावा खडसेंनी केला आहे.
“भाजपमध्ये प्रवेश करावा असे माझे मत पूर्वीपासून होते. काही कारणे त्याची होती. त्या कारणांची मीमांसा जयंत पाटील आणि शरद पवारांकडे केली. माझ्या काही अडचणी होत्या. पण, आता अशा स्थितीत मला विचार करावा लागेल. भाजपचा फार काही चांगला प्रतिसाद मिळत नाहीये आणि त्यामुळे आता राजकीय भवितव्यासाठी मला कुठला तरी निर्णय घेणे आवश्यक आहे. (केपीएन)भाजपमध्ये प्रवेश करण्यात यावा, अशी विनंती भाजपकडे केली होती. मात्र, भाजपकडून पूर्ण प्रतिसाद मिळाला नाही. मी अजूनही राष्ट्रवादीचाच आमदार आहे आणि शरद पवार यांनी मला राजीनामा देण्यास नकार दिला आहे. मी भाजपकडून प्रतिसादाची अजून काही दिवस वाट पाहीन आणि नंतर माझ्या मूळ राष्ट्रवादीमध्ये सक्रीय होईल.”
आ. खडसेंना नुकत्याच पंतप्रधान नरेंद्र मोदींच्या दौऱ्यात देखील प्रशासनाकडून आमंत्रण देण्यात आले नव्हते. यामुळे जिल्हा प्रशासनावर टीकेची झोड उठली होती. आता यावर भाजपचे नेते प्रवीण दरेकर यांनीदेखील प्रतिक्रिया दिली आहे. आ. एकनाथ खडसेंच्या प्रवेशाबद्दल निर्णय झालेला नाही. पण, जळगावमधील कार्यकर्ते, पदाधिकारी, नेते यांचा त्यांच्या प्रवेशावर आक्षेप आहे. भाजप ही काही ये जा करणाऱ्यांचा पक्ष नाही. त्यामुळे तुमच्या सोयीनुसार तुम्ही पक्षात येणार आणि तुमच्या सोयीनुसार तुम्ही राष्ट्रवादीत जाणार हे अभिप्रेत नाही”, अशी टीका प्रवीण दरेकर यांनी केली आहे.”पंतप्रधान नरेंद्र मोदी जळगावला आले होते. त्यावेळी खडसेंना अपेक्षा असेल की, मला बोलावतील, पण हा कार्यकर्त्यांचा पक्ष आहे. भाजपचे उत्तर महाराष्ट्रात संघटन मजबूत आहे, असेही दरेकरांनी म्हटले आहे.