यावल तालुक्यात महावितरणची धडक कारवाई
यावल (प्रतिनिधी) : तालुक्यातील गिरडगाव येथे महावितरण कंपनीच्या वतीने वीज चोरी विरुद्ध धडक मोहीम राबवण्यात आली. यामध्ये तीन जण वीज चोरी करताना पकडले. या तिघांना त्यांनी चोरी केलेल्या वीज युनिट नुसार दंड आकारून दंड भरण्यासाठी नोटीस देण्यात आली. मात्र, तिघांनी दंड भरला नसल्याने यावल पोलिस ठाण्यात शनिवारी तिघांविरुद्ध वीज चोरीचा गुन्हा दाखल करण्यात आला आहे.
तपासणी मोहिमेमध्ये भिका ताराचंद सोनवणे, संभाजी राघो पाटील व आत्माराम ओंकार पाटील हे तीन जण वीज चोरी करताना आढळून आले होते. किनगाव येथील महावितरण कंपनीच्या कक्षाचे सहायक अभियंता पंकज विकास कांबळे यांच्यासह पथकाने दिनांक २५ फेब्रुवारी २०२१ रोजी वीजचोरी विरुद्ध धडक मोहीम राबवली होती. तिघांनी ६७८ युनिट वीज चोरी केली होती. त्यांना १७ हजार ९८० रुपये दंड भरण्यासाठी नोटीस देण्यात आली.
मात्र, या तिघांनी वेळेत दंड भरला नाही म्हणून यावल पोलिस ठाण्यात पंकज कांबळे यांच्या फिर्यादीवरून तिघांविरुद्ध गुन्हा दाखल करण्यात आला आहे.
