अल्पवयीन तरुणांसह तिघांनी केला कारमध्ये जीवे मारण्याचा प्रयत्न, गावठी पिस्तूल जप्त
चाळीसगाव (प्रतिनिधी) : गेल्या आठवड्यात तरुणाच्या अपहरणप्रकरणी चाळीसगाव पोलिसांनी एका अल्पवयीन मुलासह तीन आरोपींना अटक केली आहे. त्यांच्याकडून गुन्ह्यात वापरलेले वाहन, पिस्तूल जप्त केले असून, उर्वरित तिघांचा पोलिस शोध घेत आहेत.
दि.१७ रोजी रात्री ११ वाजेच्या सुमारास सुमित्रा सुनील पाटील (नवा मालेगावरोड, चाळीसगाव) यांनी त्यांचा मुलगा कल्पेश सुनील पाटील (२५) यास दोन मुलांनी जबरदस्तीने उचलून नेल्याची तक्रार त्यांनी पोलिस स्थानकांत दिली होती. माहीती मिळताच पोलिस निरीक्षक संदीप पाटील यांनी पोलिस पथक रवाना केले. अपहृत कल्पेश याने नाशिक जिल्ह्यातील सटाणा येथे उडी मारून सुटका करून घेतल्याची माहिती प्राप्त झाली. लागलीच पोलिस अंमलदार हे सटाणा पोलिस स्टेशनकडे रवाना झाले. त्यांनी कल्पेश पाटील यास ताब्यात घेतले.
त्याची विचारपूस केली असता त्याने सांगितले की, दि. २० रोजी रात्री राखुंडे नगर येथून आपण जात असताना दोघा अल्पवयीन मुलांनी आपल्याला पिस्तुलाचा धाक दाखवून दुचाकीवर बसविले. या अल्पवयीन मुलाच्या वडिलांचे आपण मारेकरी असल्याच्या संशयातून अपहरण केले होते, असे कल्पेश याने सांगितले.
या दोन्ही मुलांनी गाडी सटाणा येथील पेट्रोल पंपावर पेट्रोल भरण्यासाठी नेली असता संधीचा फायदा घेत कल्पेशने कारचा दरवाजा उघडून उडी मारली. तसेच मदतीसाठी आरडाओरड केली असता लोक जमा झाले. त्यामुळे आरोपी हे कल्पेश यास सोडून कारसह पळून गेल्याचे कल्पेशने सांगितले.
संशयित आरोपींनी कल्पेशला कारमध्ये बसविले. त्याला जिवंतच ठेवायचे नाही, असा निश्चय करत कधी त्यांच्याकडील बागायती रुमालने कल्पेश यास फाशी देण्याचा प्रयत्न केला. त्यातील एक मुलगा हा त्याच्या वडिलांच्या खुन्याचा पत्ता विचारत होता व न सांगिल्यास ठार मारू, अशी धमकी देत होता. दोघेही अल्पवयीन फास आवळत असल्याने कल्पेशने रुमाल हातात पकडण्याचा प्रयत्न केला. मात्र त्यांनी त्याच्या हातावर काठ्यांनी व पट्ट्याने मारहाण केली, असे कल्पेशने सांगितले.
कृष्णा जिभाऊ झेलते (२०, पवारवाडी चाळीसगाव), मेहुल रत्नपाल मोरे (१९, हनुमानवाडी, चाळीसगाव) या दोघांना अटक करण्यात आली आहे, तर एका अल्पवयीन मुलासही ताब्यात घेण्यात आले आहे. आरोपींनी वापरलेले गावठी कट्टा, कार तसेच कल्पेश यास गळफास देण्यासाठी वापरलेला रुमाल जप्त करण्यात आला आहे. उर्वरित तिघांचा पोलिस शोध घेत आहेत.
