नगर जिल्ह्यातील पारनेर फाट्यावरील घटना
सोयगाव (प्रतिनिधी) : घर साहित्य घेऊन जात असताना वाहनातील साहित्याचा बांधलेला दोर सुटला. म्हणून वाहन कडेला लावून दोरी बांधत असताना नगरकडून भरधाव आलेल्या अज्ञात वाहनाने दोघांना चिरडले. झालेल्या अपघातात एक जण जागीच ठार तर दुसरा गंभीर जखमी झाल्याची घटना शुक्रवारी दि. १९ जुलै रोजी पहाटे पाच वाजता नगर-पुणे रस्त्यावर सुपे गावाजवळ पारनेर फाट्यावर घडली.
सोयगाव तालुक्यातील जरंडी येथील डॉ. गणेश गुणवंत पवार (वय ३९) व राहुल लिंबाजी राठोड (वय २७) हे छोटा हत्ती वाहन क्र. एम एच-१९ सीएक्स ०४२४ यामध्ये घर साहित्य पुण्याकडे घेऊन जात होते. (केसीएन)सुपे गावाजवळ पारनेर फाट्यावर लघु शंकेसाठी थांबले होतो. नंतर वाहनाजवळ येऊन वाहनातील साहित्याची बांधलेली दोरी ढिली झाल्याचे पाहून त्या दोरीला पुन्हा बांधायला लागले. तेव्हा अचानक नगरकडून भरधाव वेगात आलेल्या अज्ञात वाहनाने या दोघांना चिरडून वाहन घेवून चालक फरारी झाला आहे.
दरम्यान, सुपे पोलीस ठाण्याचे पोलीस शिपाई दिनेश मोरे यांनी तातडीने घटनास्थळी धाव घेवुन पंचनामा केला. (केसीएन)डॉ. गणेश गुणवंत पवार यास तातडीने उपचारासाठी पारनेर उपजिल्हा रुग्णालयात दाखल केले असता त्यास वैद्यकीय सूत्रांनी मृत घोषित केले. दुसरा राहुल लिंबाजी राठोड (वय २६) यास बेशुद्ध अवस्थेत नगर येथील जिल्हा रुग्णालयात दाखल करण्यात आले आहे. त्याच्या मेंदूला मार लागला आहे.
दरम्यान अपघातात मृत झालेल्या डॉ. गणेश पवार यांच्या पश्चात आई, वडील, पत्नी, एक भाऊ असा परिवार आहे. शुक्रवारी रात्री त्याचेवर अंत्यसंस्कार करण्यात आले. घटनेची माहिती जरंडी गावात वाऱ्यासारखी पसरताच गावात शोककळा पसरली.
