एलसीबीची कारवाई
जळगाव (प्रतिनिधी) : येथील तालुका पोलीस स्टेशन आणि मध्य प्रदेशातील नेपानगर येथील दाखल गुन्ह्यातील फरार संशयित आरोपीला स्थानिक गुन्हे अन्वेषण शाखा (एलसीबी)ने पुण्यातील पिंपरी चिंचवड भागातून शिताफिने ताब्यात घेऊन अटक केली आहे. त्याला पुढील तपास कामी जळगाव तालुका पोलीस स्टेशनला जमा करण्यात आले आहे.
योगेश उर्फ ऋतिक दिगंबर कोल्हे (वय ३२, रा. असोदा ता. जळगाव) असे फरार संशयित आरोपीचे नाव आहे. त्याच्यावर जळगाव तालुका पोलीस स्टेशन येथे दरोड्याचे व मारहाणीचे गुन्हे दाखल आहेत. तसेच नेपानगर येथे चोरीचा गुन्हा दाखल आहे. एमपीडीए कारवाईसाठी देखील तो हवा होता. त्याचा शोध करण्यासाठी स्थानिक गुन्हे अन्वेषण शाखेचे वरिष्ठ पोलीस निरीक्षक बबन आव्हाड यांनी पथक तयार केले होते.
त्यानुसार या पथकाने गोपनीय माहितीवरून पुण्यातील पिंपरी चिंचवड भागातील थेरगाव भागामध्ये मित्र आणि नातेवाईकांकडे अस्तित्व लपवून राहत असताना तसेच तो थेरगाव येथे पहाटे नातेवाईकांकडे येत असताना भर पावसात सापळा रचून शिताफिने दि. ७ जुलै रोजी अटक केली आहे.
सदर कारवाई पोलीस अधीक्षक डॉ. महेश्वर रेड्डी, अप्पर पोलीस अधीक्षक अशोक नखाते, डीवायएसपी संदीप गावित यांच्या मार्गदर्शनाखाली वरिष्ठ पोलीस निरीक्षक बबन आव्हाड, अंमलदार जितेंद्र पाटील, नितीन बाविस्कर, बबन पाटील, ईश्वर पाटील यांनी केली आहे. त्याला पुढील तपास कामी जळगाव तालुका पोलीस स्टेशनच्या ताब्यात देण्यात आले आहे.
