पारोळा (प्रतिनिधी) : तालुक्यातील लोणी बुद्रुक येथे सायंकाळच्या सुमारास वीज कोसळून एक गोऱ्हा व एक बैल मृत्यूमुखी पडल्याची घटना दि. ९ रोजी घडली. शेतकऱ्याचे हजारो रुपयांचे नुकसान झाले आहे.
पारोळा तालुक्यातील लोणी बुद्रुक येथे दि. ९ रोजी दुपारी ४ वाजेपासून वादळ वाऱ्यासह पाऊस झाला. लोणी बुद्रुक येथे मुसळधार पावसामुळे येथील शेतकरी किशोर विनायक पाटील यांच्या शेतात वीज कोसळल्याने त्यांच्या मालकीचे एक गोऱ्ह व एक बैल मृत्यूमुखी पडल्याची घटना घडली. सदरची घटना कळताच गावकऱ्यांसह शेतकऱ्यांनी शेतात धाव घेतली. परंतु गोऱ्ह व बैल जागीच मयत झाले होते.
या बाबत पशुधन विकास अधिकारी डॉ. शांताराम पाटील, डॉ. असिफ कुरेशी व त्यांच्या टीमने सदर घटनास्थळी जाऊन जनावरांची पाहणी केली. त्यानंतर मयत गुरांचे शविच्छेदन करण्यात आले. नैसर्गिक आपत्तीमुळे सदर शेतकऱ्याचे दोन जनावरे दगावली आहेत. याबाबत शासन स्तरावरून शेतकऱ्याला मदत मिळावी, अशी मागणी केली जात आहे.
