जिल्हाधिकारी आयुष प्रसाद यांचे आदेश
जळगाव (प्रतिनिधी) – शहरात गुन्हेगारीच्या क्षेत्रात कुप्रसिद्ध असलेला व एमआयडीसी पोलिस स्टेशनच्या हद्दीतील सराईत गुन्हेगार भुषण उर्फ भासा विजय माळी (वय २४, तुकारामवाडी) याला एमपीडीए कायद्यातंर्गत स्थानबद्ध करण्यात आले आहे. जिल्हाधिकारी आयुष प्रसाद यांनी हे आदेश काढले आहेत. भुषण माळी याची कोल्हापुर मध्यवर्ती कारागृहात रवानगी करण्यात आली आहे.
भुषण माळी याच्या विरुध्द अनेक गंभीर गुन्हे दाखल आहेत. त्याची तुकारामवाडी व परिसरात प्रचंड दहशत होती. त्याच्या व त्याच्या टोळीच्या नावाची दहशत व्हावी यासाठी त्याने सर्वसामान्य नागरिकांना विनाकारण मारहाण करुन, शिवीगाळ करण्याचेही अनेक प्रकार केले. त्याच्या विरुध्द एकूण १३ गुन्हे दाखल आहेत. त्याच्यावरील गुन्ह्यांच्या आलेख पाहता, त्याला दोन वर्षांसाठी हद्दपार देखील करण्यात आले होते. हद्दपारीनंतर देखील त्याने गुन्हेगारी कृत्य सुरुच ठेवले होते.
तुकारामवाडी परिसरात त्याच्या साथीदारांसह एका घरात घुसून तोडफोड केलेली होती. त्याच्या गुन्हेगारी कारवायांवर आळा बसावा यासाठी त्याच्या विरुध्द एमआयडीसी पोलिस स्टेशनकडून एमपीडीए अंतर्गत स्थानबद्ध करण्याबाबतचा प्रस्ताव जिल्हा पोलिस अधीक्षकांकडे पाठविण्यात आला होता. त्यांच्याकडून हा प्रस्ताव जिल्हाधिकाऱ्यांकडे पाठविण्यात आला. गुरुवारी जिल्हाधिकाऱ्यांनी त्याच्या स्थानबद्धतेचे आदेश पारीत केले. हा आदेश पारीत झाल्यानंतर भुषण माळीला कोल्हापुर कारागृहात स्थानबद्ध करण्यात आले आहे.
