विद्युतपुरवठा खंडित केल्याचा रागातून जळगावात तरुणांचे कृत्य
जळगाव (प्रतिनिधी) :- शहरातील महावितरण कंपनीचे गिरणा पंपिंग सबस्टेशन अंतर्गत महाबळ येथील कार्यालयात कामावर हजर असलेल्या कर्मचाऱ्याला विद्युत पुरवठा खंडित केल्याच्या कारणावरून हरीविठ्ठल नगरातील एकाने बेदम मारहाण केली. तसेच दोघांनी कार्यालयावर दगडफेक केल्याची घटना बुधवारी दि. २२ मे रोजी रात्री १२ वाजेच्या सुमारास घडली आहे. याप्रकरणी रामानंदनगर पोलीस ठाण्यात तक्रार दाखल करण्यात आली आहे.
शहरातील गिरणा पंपिंग रोडवरील महावितरण कंपनीचे सबस्टेशनच्याअंतर्गत महाबळ परिसरात कार्यालय आहे. या ठिकाणाहून खंडेराव नगर, हरीविठ्ठल नगर, वाघ नगर, रामानंदनगर, समता नगर येथे विद्युतपुरवठा करण्याचे काम केले जाते. दरम्यान बुधवारी दि. २२ मे रोजी रात्री १२ वाजेच्या सुमारास संशयित आरोपी दीपक सपकाळे (रा. हरिविठल नगर, जळगाव) यांच्यासह एक जण असे २ जण महाबळ कार्यालयात आले. त्या ठिकाणी कर्मचारी किरण दत्तात्रय सपकाळे (रा. दादावाडी) हे कामावर हजर होते.
दरम्यान दीपक सपकाळे हा तेथे येऊन कर्मचारी किरण सपकाळे यांना, लाईट चालू बंद का करतो ? असे बोलून त्यांना कार्यालयात ओढून बेदम मारहाण केली. तसेच कार्यालयाच्या बाहेर येऊन दोघांनी कार्यालयावर दगडफेक केली व निघून गेले. दरम्यान ही घटना घडल्यानंतर सकाळी ११ वाजता महावितरण कंपनीच्या विभागातील सर्व कर्मचाऱ्यांनी रामानंदनगर पोलीस ठाण्यात धाव घेऊन तक्रार दिली आहे.
