जळगावातील दुपारची घटना
जळगाव (प्रतिनिधी) :- तालुक्यातील शिरसोली येथील व्यक्तीची दुचाकी चोरण्याचा प्रयत्न करणाऱ्या दोन दुचाकी चोरट्यांना दुचाकी मालकाने चोप दिला. दरम्यान, जमलेल्या गर्दीचा फायदा घेत चोरटे पसार झाले. याबाबत शनिपेठ पोलिसांना माहिती देण्यात आली आहे.
कुणाल मुरलीधर बारी (वय २२, रा. शिरसोली, ता. जळगाव) हा तरुण त्याच्या मित्रासह जळगावात राजकमल टॉकीज परिसरात वस्तू घेण्यास आला होता. त्यावेळी त्याने एका दुकानासमोर दुचाकी क्र. एमएच १९ जीटी ६६७८ हि उभी केली होती. काही वेळाने तेथे दोन अज्ञात तरुण आले. त्यांनी काहीतरी वस्तूने दुचाकी सुरु करण्याचा प्रयत्न सुरु केला. हि बाब कुणाल बारी यांना लक्षात येताच, त्यांनी जाब विचारला. संशयित तरुणांनी अरेरावी केल्याने चालकासह नागरिकांनी त्यांना चोप दिला. मात्र गर्दीचा फायदा घेत दोघेही चोरटे पसार झाले.
दरम्यान, शनिपेठ पोलीस स्टेशनला घटनेची माहिती देण्यात आली. ते पुढील तपास करीत आहेत.
