अमळनेर तालुक्यातील खापरखेडा येथील घटना
अमळनेर (प्रतिनिधी) :- तालुक्यातील खापरखेडा येथील ७५ वर्षीय वृद्धाने गळफास घेत आत्महत्या केली. ही घटना मंगळवारी ता. २८ घडली. मारवाड पोलीस स्टेशनला घटनेची नोंद करण्यात आली आहे.
खापरखेडा येथील साहेबराव दामू पाटील (वय ७५) हे अल्पभूधारक शेतकरी असून, दोन बिघे शेतीवर त्यांचा व पत्नीचा उदरनिर्वाह होता. त्यांची मुले कामासाठी बाहेरगावी राहत होती. मृत साहेबराव यांच्या पत्नी गावी गेल्या होत्या. साहेबराव पाटील मंगळवारी ता. २८ ला त्यांचे नातेवाईक त्यांना जेवणासाठी बोलवायला गेले असता त्यांनी राहत्या घरी छताच्या लोखंडी रॉडला दोराने गळफास लावून घेतल्याचे दिसून आले.
अमळनेर ग्रामीण रुग्णालयात दाखल केले असता डॉक्टरांनी मृत घोषित केले. आतेभाऊ बाबूलाल पाटील यांच्या फिर्यादीवरून मारवड पोलिसांत अकस्मात मृत्यूची नोंद करण्यात आली आहे. त्यांच्यावर शेतीचे व हातउसनवारीचे कर्ज असल्याची माहिती कुटुंबीयांनी दिली आहे.
