चाळीसगाव तालुक्यातील मेहुणबारे येथील घटना
चाळीसगाव (प्रतिनिधी) :- खाजगी प्रवाशी वाहतूक करणाऱ्या ट्रॅव्हल्सचा बुधवारी सकाळी भीषण अपघात झाल्याची घटना चाळीसगाव तालुक्यातील मेहुणबारे गावाजवळ घडली. घटनेत बस पलटी झाली त्याठिकाणी जास्त खोल भाग नसल्याने मोठी दुर्घटना टळली आहे. मात्र बसमधील सर्व प्रवासी बालंबाल बचावले आहेत. घटनेत ३ ते ४ प्रवासी जखमी झाले आहेत. मेहुणबारे पोलीस स्टेशनला घटनेची नोंद करण्यात आली आहे.
सदर अपघात धुळे- सोलापूर राष्ट्रीय महामार्गावर सकाळी घडला. खाजगी बस अहमदाबाद (गुजरात) येथून औरंगाबादच्या दिशेने जात होती. दरम्यान सकाळी बस मेहुणबारे गावाजवळ आली असता चालकाचे बसवरील नियंत्रण सुटले. गावाजवळील गिरणा पुलाच्या जवळ बस रस्त्याच्या खाली उतरून पलटी झाली. बस पलटी झाली. अपघात झाल्यानंतर गावातील नागरिक मदतीसाठी धावले.
घटनेत कुठलीही जीवितहानी झालेली नसून यात बसमधील तीन प्रवाशी जखमी झाले आहेत. सर्व प्रवाशांना सुखरूप बाहेर काढण्यात आले. जखमींना रुग्णालयात दाखल करण्यात आले. अपघाताची माहिती मिळताच मेहुणबारे पोलीस स्टेशनचे विष्णू आव्हाड यांच्यासह टीम तातडीने घटनास्थळी दाखल झाली. यानंतर महामार्ग पोलीस देखील घटनास्थळी दाखल झाले. अपघातामुळे महामार्गावरील वाहतूक खोळंबली होती.
