चाळीसगाव ते नांदगाव दरम्यानची घटना
जळगाव (प्रतिनिधी) :- शहरातील ३१ वर्षीय तरुण चाळीसगाव ते नांदगाव दरम्यान रेल्वे अपघातात गंभीर जखमी झाला होता. त्याचा उपचारादरम्यान शनिवारी २५ नोव्हेंबर रोजी पहाटे दुर्दैवी मृत्यू झाल्याची घटना घडली आहे. याप्रकरणी शहर पोलीस स्टेशनला अकस्मात मृत्यूची नोंद करण्यात आली आहे.
राहुल रामण्णा गवळी (वय ३१, रा. शनिपेठ, जळगाव) असे मयत व्यक्तीचे नाव आहे. तो शुक्रवारी संध्याकाळी नाशिककडे रेल्वेने गेला होता. चाळीसगाव ते नांदगावदरम्यान तो रेल्वेतून पडल्याने गंभीर जखमी झाला होता. त्याला मालेगाव येथील सरकारी रुग्णालयात उपचारासाठी नेण्यात आले होते. रात्री त्याला जळगाव येथील शासकीय वैद्यकीय महाविद्यालय व रुग्णालयात उपचारासाठी आणण्यात आले होते.
दरम्यान, २५ नोव्हेंबर रोजी पहाटे त्याचा उपचारादरम्यान मृत्यू झाला. यावेळी कुटुंबीयांनी व नातेवाईकांनी आक्रोश केला. याप्रकरणी शहर पोलीस स्टेशनला अकस्मात मृत्यूची नोंद करण्यात आली आहे. मयत राहुल गवळी याचे पश्चात आई, वडील, १ भाऊ, पत्नी असा परिवार आहे.
