- बाजारपेठ पोलीस स्टेशन हद्दीतील घटना
भुसावळ (प्रतिनिधी) : शहरात कायदा व सुव्यवस्थेचा मुद्दा पुन्हा एकदा ऐरणीवर आला आहे. भुसावळ शहरात तरुणाच्या खून झाल्याचे उघड झाले आहे. बाजारपेठ पोलीस स्टेशनच्या हद्दीत हा खून झाला असून पोलीस अधिक तपास करीत आहेत.
भुसावळ शहरातील खडका रोड परिसरातील सिद्धेश्वर महादेव मंदिरा जवळील मणियार हाॅल जवळ आपसी वादातून रविवारी नाजीर शेख नशीर ( वय ३१) या तरूणावर धारदार शस्त्राने मामीच्या भावाने व भाच्याने हा हल्ला केला असल्याचे सांगण्यात आले. या हल्ल्यात त्याच्या छातीत चाकूने वार झाल्याचे दिसत असून हातावर वार आहेत. परिसरातील नागरिकांनी धाव घेऊन त्याला तात्काळ जळगाव येथे शासकीय वैद्यकीय महाविद्यालय व रुग्णालयात दाखल केले. येथे वैद्यकीय अधिकारी डॉ. सचिन पाटील यांनी त्याला तपासणी अंती मृत घोषीत केले. मयत नाजीर शेख नाशिर याच्या आप्तांनी जिल्हा रूग्णालयाच्या परिसरात आक्रोश केला.
दरम्यान, या संदर्भात ‘केसरीराज’ च्या प्रतिनिधीने पोलीस निरीक्षक बबन आव्हाड यांच्याशी संपर्क साधला. सदर खुनाबाबत माहिती घेणे सुरू असून फिर्याद दाखल झाल्यावर सविस्तर सांगता येईल असे त्यांनी सांगितले. याबाबत बाजारपेठ पोलीस स्थानकात घटना नोंदविण्याचे काम सुरू होते.
