जीएसटी अधिकारी सांगून मागितली रक्कम, सापळा रचून उद्योजकांनी पकडले
जळगावातील एमआयडीसी परिसरातील घटना, गुन्हा दाखल
जळगाव (प्रतिनिधी) – जीएसटी विभागाचा निरीक्षक असल्याचे सांगत उद्योजकांना वेगवेगळी भीती दाखवत त्यांच्याकडे २० ते ३० लाखांची मागणी करणाऱ्या तोतया जीएसटी अधिकाऱ्याला वैतागलेल्या उद्योजकांनीच पकडले. विशेष म्हणजे महाराष्ट्र शासन असा उल्लेख असलेले वाहन घेऊन हा तोतया अधिकारी कंपन्यांमध्ये जाऊन धमक्या देत होता. त्याच्यावर संशय आल्याने त्याला पकडून शुक्रवारी पोलिसांच्या ताब्यात देण्यात आले. त्याच्यावर एमआयडीसी पोलीस स्टेशनला गुन्हा दाखल करण्यात आला आहे.
भाऊसाहेब दशरथ ठाकरे असे या तोतया अधिकाऱ्याचे नाव आहे. गेल्या काही वर्षांपासून जळगाव औद्योगिक वसाहत परिसरातील वेगवेगळ्या कंपन्यांमध्ये जाऊन उद्योजकांच्या कागदपत्रांची पाहणी करीत एक अधिकारी उद्योजकांना वारंवार त्रास देत होता. त्यात गेल्या दोन दिवसांपूर्वी हा तोतया अधिकारी उद्योजक अशोक मुंदडा यांच्या कंपनीत आला. कागदपत्रांची पाहणी केली. नाशिक येथील वरिष्ठ अधिकारी चौरसिया यांच्या नावाने तडजोडीची मागणी केली. त्यासाठी त्याने थेट ३० लाख रुपये मागितले. त्याच्यावर संशय आल्याने मुंदडा हे सावध झाले. तो तोतया अधिकारी शुक्रवारी पुन्हा येणार असल्याने त्यांनी भाऊ राजेश मुंदडा, मित्र उद्योजक दिलीप छत्रीवाला, ललित लढ्ढा यांना बोलवून ठेवले होते.
शुक्रवारी हा तोतया महाराष्ट्र शासन असा उल्लेख असलेली कार (क्र. एमएच १९, सीवाय ००२५) घेऊन कंपनीत पोहचला. त्याने वरिष्ठ अधिकाऱ्यांशी चर्चा करून देतो, असे सांगितले. त्या वेळी त्याचे ओळखपत्र दाखविण्यास सांगितले असता तो ते दाखवू शकला नाही. त्या वेळी त्याची उलट तपासणी केली असता तो माहिती देऊ शकला नाही. तोतया अधिकारी असल्याचा संशय आल्याने त्याच्या मोबाईल व कारची तपासणी केली असता त्याच्या कारमध्ये अनेक कागदपत्रे सापडली. त्याच्या मोबाईलची तपासणी केली असता त्यात वेगवेगळ्या उद्योजकांकडे पैशांची मागणी केल्याचे चॅटमधून समोर आल्याचे मुंदडा यांनी सांगितले. यावेळी त्याने आरडाओरडा करीत, तुम्हाला मी सोडणार नाही, तुमच्यावर आता धाडीवर धाडी पडतील असे धमकी देऊ लागला.
सर्व उद्योजकांनी या तोतया अधिकाऱ्याला एमआयडीसी पोलिसांच्या ताब्यात दिले. त्यानुसार अशोक मुंदडा यांच्या फिर्यादीवरून एमआयडीसी पोलीस स्टेशनला गुन्हा दाखल करण्यात आला आहे. तपास पोहेकॉ दत्तात्रय बडगुजर करीत आहेत.
