जिल्हा परिषदेच्या मुख्य कार्यकारी अधिकारी पदाचा श्री अंकित यांनी घेतला पदभार
जळगाव (प्रतिनिधी) – जिल्हा परिषदेचे तत्कालीन मुख्य कार्यकारी अधिकारी डॉ. पंकज आशिया यांची यवतमाळ येथे जिल्हाधिकारी पदी नियुक्ती झाल्यानंतर त्यांच्या रिक्त जागी श्री. अंकित यांची जळगाव जिल्हा परिषदेच्या मुख्य कार्यकारी अधिकारीपदी नियुक्ती झाली आहे. सोमवार दि. २४ रोजी श्री अंकित यांनी मुख्य कार्यकारी अधिकारी पदाचा कार्यभार स्वीकारला.शैक्षणिक गुणवत्ता वाढवण्याबरोबर शिक्षणात तंत्रज्ञानाचा समावेश कसा करता येईल यावर या पुढच्या काळात लक्ष देणार असल्याची माहिती त्यांनी पत्रकारांना दिली.
यावेळी उपमुख्य कार्यकारी अधिकारी स्नेहा पवार, जिल्हा ग्रामीण विकास यंत्रणेचे लोखंडे, उपमुख्य कार्यकारी अधिकारी ग्रामपंचायत अनिकेत पाटील, जिल्हा आरोग्य अधिकारी स्वप्निल बाहेकर, शिक्षण अधिकारी विकास पाटील, नितीन बच्छाव, तसेच जिल्हा परिषदेच्या सर्व खाते प्रमुखांनी नवनियुक्त मुख्य कार्यकारी अधिकारी यांचे स्वागत केले. तदनंतर मुख्य कार्यकारी अधिकारी श्री अंकित यांनी जिल्हा परिषदेच्या सर्व खातेप्रमुखांकडून जिल्हा परिषदेतील विविध विभागाच्या कामकाजाचा आढावा घेतला.
यावेळी माध्यम प्रतिनिधींशी बोलताना मुख्य कार्यकारी अधिकारी श्री अंकित म्हणाले की, यापूर्वीचे मुख्य कार्यकारी अधिकारी श्री आशिया यांनी त्यांच्या कालावधीत अनेक महत्त्वाच्या योजना जिल्हा परिषदेत सुरू केलेले आहेत. अशाच पद्धतीने सुरू ठेवण्यात येतील. केळी हे या जिल्ह्याचे मुख्य पीक आहे त्यामुळे केळीवर प्रक्रिया करून बचत गटांच्या माध्यमातून केळीला बाजारपेठेत व्यासपीठ उपलब्ध करून देण्याचा प्रयत्न राहील. जिल्हा परिषदेच्या प्राथमिक शाळांमध्ये चांगले आणि गुणवत्तापूर्णवक शिक्षण देण्यावर भर राहील.
त्या दृष्टीने शिक्षकांना प्रशिक्षण देणे शाळांमध्ये तंत्रज्ञानाचा वापर करणे यासाठी विशेष प्रयत्न केले जातील असेही श्री अंकित यांनी सांगितले. मुख्य कार्यकारी अधिकारी श्री अंकित हे मूळचे हरियाणा येथील असून त्यांच्या शिक्षण आयआयटी दिल्ली येथे झाले आहे. त्यांनी तीन वर्ष जपान मध्ये खाजगी नोकरी देखील केली आहे. तर प्रशासनात आल्यानंतर सोलापूर आणि गडचिरोली जिल्ह्यातील अहेरी येथे देखील त्यांनी काम केले आहे.
