पहूर येथील घटनेचे एलसीबीपुढे आव्हान, ४० दिवसांनी झाला उलगडा
जळगाव (प्रतिनिधी) : जामनेर तालुक्यातील जाभुंळ गावातील बेपत्ता इसमचा खून झाल्याचे निष्पन्न झाले असून स्थानिक गुन्हा अन्वेषण शाखेच्या पथकाने (एलसीबी) याप्रकरणी कसून तपास केला आहे. मयत इसमाच्या एका मित्राला ताब्यात घेतले असून त्याने खुनाची कबुली दिल्याची माहिती मिळाली आहे. दरम्यान मयत व्यक्तीचा मृतदेह अद्याप मिळालेला नाही. दरम्यान संशयित आरोपीने खुनासाठी वापरलेला दगड आणि कुऱ्हाड देखील पोलिसांना काढून दिली आहे तसेच, त्याचे कपडे, मोबाईल व इतर वस्तू मिळाल्या असून पोलिसांची तपासणी सुरूच आहे. याप्रकरणी पहूर पोलीस स्टेशनला खुनाचा गुन्हा दाखल करण्यात आलेला आहे.
कैलास विठोबा वडाळे (वय 49, रा. जाभुंळ ता. जामनेर) असे मयत इसमाचे नाव आहे. ते शेती काम करून उदरनिर्वाह करतात. त्यांच्या पश्चात दोन मुले असा परिवार आहे. दरम्यान 13 मे रोजी दुपारी 3 वाजेनंतर कधीतरी ते बेपत्ता झाल्याची तक्रार पहुर पोलीस स्टेशनला 14 मे ला त्यांचा मोठा मुलगा अविनाश वडाळे याने दाखल केली होती.
कैलास वडाळे यांच्या कुटुंबीयांनी संशयित म्हणून त्यांचा मित्र रमेश मोरे याचे नाव पहूर पोलिसांना सांगितले होते. मात्र पहूर पोलिसांनी त्याच्यावर लक्ष केंद्रित केला नसल्याचा आरोप कुटुंबीयांनी केला आहे. महिनाभर पहूर पोलीस बेपत्ता वडिलांचा कुठलाच शोध घेत नाही हे पाहून कैलास वडाळे यांच्या कुटुंबीयांनी काही दिवसांपूर्वी पोलिस अधीक्षक एम. राजकुमार यांची भेट घेतली होती. त्यानुसार पोलीस अधीक्षकांनी याबाबत तपास एलसीबीला करण्याचे सांगितले होते.
एलसीबीने बेपत्ता इसमाचा दोन दिवसात उलगडा केला. सदर इसमाचा मित्र रमेश मोरे (वय ५४, रा.वडाळी ता.जामनेर, व्यवसाय : ट्रॅक्टर चालक) याला ताब्यात घेतले. त्याची कसून चौकशी केली. त्यामध्ये त्यांनी खून केल्याची कबुली दिली. घटनास्थळ देखील दाखवले. घटनास्थळी मयताचे कपडे, मोबाईल व इतर वस्तू मिळून आल्या मात्र मृतदेह मिळाला नाही. त्याबाबत त्याला विचारले असता त्याने अजूनही समाधानकारक उत्तरे दिलेली नाही. खुनासाठी वापरलेला दगड आणि कुऱ्हाड देखील त्याने काढून दिली असल्याचे समजते त्यामुळे मृतदेह शोधण्याबाबत आता एलसीबी समोर फार मोठे आव्हान उभे आहे.
मात्र येत्या दिवसात घटनेचा पूर्ण उलगडा होईल, अशी माहिती अधिकाऱ्यांनी दिली. दरम्यान मयत कैलास वडाळे यांनी संशयित आरोपी रमेश मोरे याला वीस हजार रुपये उसनवार दिले होते. ते पैसे परत मागितल्याचा राग आल्यावरून रमेश मोरे याने हा खून केला असल्याचे प्रथमदर्शनी दिसून येत आहे.दरम्यान कैलास वडाळे यांचा मुलगा अविनाश याच्या फिर्यादी वरून पहुर पोलीस स्टेशनला खुनाचा गुन्हा दाखल करण्यात आला आहे. पुढील तपास पोलीस निरीक्षक प्रताप इंगळे यांच्याकडे आहे.
