जळगाव शहरातील लांडोरखोरी उद्यानाजवळची घटना
जळगाव (प्रतिनिधी) : शहरातील लांडोरखोरी वन उद्यानाकडून मोहाडी रस्त्यावर मॉर्निंग वॉकला गेलेल्या महिलेसह तिचा पती व अन्य एकाला रानडुकराने हल्ला करून गंभीर जखमी केले. ही घटना मंगळवारी सकाळी ६.३० वाजता घडली. दरम्यान वन विभागाने रानडुकराला ताब्यात घेऊन वन्य अधिवासात सोडले असल्याची माहिती मिळाली.
या हल्ल्यात महिलेच्या मांडीवर व हाताच्या बोटांवर रानडुकराने चावा घेतल्याने महिला जखमी झाली असून, जिल्हा रुग्णालयात उपचार सुरू आहेत. शहरातील संभाजीनगर येथील रहिवाशी असलेल्या वंदना चंद्रकांत जगताप असे जखमी महिलेचे नाव आहे. वंदना जगताप व त्यांचे पती चंद्रकांत जगताप लांडोरखोरी रस्त्यालगत दररोज मॉर्निंग वॉकला जातात. मंगळवारी दोन्ही जण नेहमीप्रमाणे मॉर्निंग वॉकला गेले होते.
लांडोरखोरी उद्यनाजवळच अचानक जगताप दाम्पत्यावर रानडुकराने हल्ला केला. त्यात चंद्रकांत जगताप दूर फेकले गेले, मात्र वंदना जगताप या डुकरासमोर आल्याने डुकराने त्यांच्यावर हल्ला केला. आजूबाजूच्या नागरिकांनी धाव घेऊन रानडुकराला हुसकावले, त्यामुळे सुदैवाने वंदना जगताप यांचा जीव वाचला. तातडीने वंदना यांना जिल्हा रुग्णालयात दाखल केले. यात अन्य एक जण देखील जखमी झाल्याची माहिती मिळाली.
महिलेवर हल्ला करणाऱ्या रानडुकराला वनविभागाच्या पथकाने लांडोरखोरी परिसरातून सकाळी ९ वाजेच्या सुमारास पकडले. त्यानंतर दुपारी या डुकराला शहरापासून दुर असलेल्या वनक्षेत्रात सोडून देण्यात आल्याची माहिती वन विभागाकडून मिळाली आहे.
