जळगाव (प्रतिनिधी) – यावल तालुक्यातील पाडळसे येथे एका तरुणीला घरासमोर राहणाऱ्या तरुणाने विनाकारण त्रास देणे सुरु केले होते. मंगळवारी ९ रोजी त्याने हद्द करीत थेट तिच्यावर चाकूहल्ला चढविला. यात तिने पोटावरील वार चुकविला, मात्र चेहऱ्यावर डाव्या बाजूने , खांद्यावर चाकूचे वार झाल्याने तरुणी रक्तबंबाळ झाली. तिच्यावर आता जळगाव शासकीय रुग्णालयात उपचार करण्यात येत आहे.
हेमलता श्रीराम हटकर (वय २१, रा. पाडळसा ता. यावल) असे जखमी तरुणीचे नाव आहे. तिच्या घरासमोर राहणारा कल्पेश तायडे नामक तरुण तिला विनाकारण त्रास देत होता. भीतीपोटी ती दुर्लक्ष करीत होती. मंगळवारी ती गावात जात असताना कल्पेशने पाठलाग सुरु केला. तिने जाब विचारताच, तो तिला चाकू दाखवून धमकावू लागला. तिने त्याला विरोध करताच त्याने पोटात चाकू मारण्याचा प्रयत्न केला. तिने वार चुकविले. मात्र चेहऱ्यावर डाव्या बाजूला व डाव्या खांद्यावर चाकूचे ३ वार झालेत.
ग्रामस्थांनी तिला रक्तबंबाळ अवस्थेत जळगाव येथील शासकीय वैद्यकीय महाविद्यालय व रुग्णालयात उपचारार्थ दाखल केले. तेथे वैद्यकीय अधिकाऱ्यांनी तिच्यावर उपचार केले. याप्रकरणी यावल पोलीस स्टेशनच्या कर्मचाऱ्यांनी घटनेची नोंद घेतली असून संबंधित संशयित कल्पेश यास ताब्यात घेण्यात आले आहे.
