भुसावळ (प्रतिनिधी) – येथील प्रांताधिकारी रामसिंग सुलाणे यांचे महसूलमंत्री राधाकृष्ण विखे पाटील यांनी निलंबन करीत असल्याची विधानसभा सभागृहात घोषणा केली आहे. गौण खनिज प्रकरणातील संशयास्पद भूमिकेबाबत प्रांताधिकारी रामसिंग सुलाणे यांचे निलंबन करण्यात आले आहे.
मुक्ताईनगरचे आ. चंद्रकांत पाटील यांनी अवैध गौणखनिज प्रकरणी विधानसभेत प्रश्‍न उपस्थित केले होते. यात प्रामुख्याने मुक्ताईनगर तालुक्यातील सातोड शिवारातील उत्खननाची तक्रार करण्यात आली होती. नंतर आमदार चंद्रकांत पाटील यांनी बोदवड तालुक्यातील महालक्ष्मी स्टोन क्रेशरच्या अवैध उत्खननाची देखील तक्रार केली होती. यात या स्टोन क्रेशर चालकाने २०१७ ते २०१९च्या दरम्यान अवैध उत्खनन केले. या प्रकरणी आपण केलेल्या तक्रारीनंतर त्याच्यावर कारवाई करण्यात आली. मात्र प्रांताधिकार्‍यांकडे अपील दाखल करण्यात आल्यानंतर या कारवाईला तात्काळ स्थगिती देण्यात आली. यामुळे या प्रकरणी महसूल यंत्रणा ही स्टोन माफियांना पाठबळ देण्यात येत असल्याचा आरोप आमदार पाटील यांनी केला.
दरम्यान, आज चंद्रकांत पाटील यांनी आज विधानसभेत हा मुद्दा पुन्हा उपस्थित करत कारवाईची मागणी केली. दरम्यान, आमदार चंद्रकांत पाटील यांच्यानंतर आमदार संजय सावकारे यांनी देखील प्रांताधिकारी रामसिंग सुलाणे यांच्या गैरकारभाराचा मुद्दा सभागृहात उपस्थित केला. यावर महसूल मंत्री राधाकृष्ण विखे पाटील यांनी भुसावळचे प्रांताधिकारी रामसिंग सुलाणे यांचे निलंबन करण्यात येत असल्याची घोषणा केली. राजपत्रित अधिकाऱ्यांमध्ये यामुळे एकच चर्चा सुरु झाली आहे.
