जळगाव ( प्रतिनिधी ) – ओबीसी आरक्षणामुळे निवडणुका पुढे ढकलण्यात आल्याने मुदत संपलेल्या नगरपालिका आणि नगरपरिषदांवर राज्य शासनाने प्रशासकांची नियुक्ती केली आहे. जिल्ह्यातील 12 नगरपालिकांवर प्रशासक नियुक्त करण्यात आले आहेत. .
राज्यातील नगरपालिका, नगरपंचायती आणि नगरपरिषदांची मुदत या महिन्याच्या अखेरीस संपत आहे. नगरपंचायतींची निवडणूक 21 डिसेंबररोजी घेण्यात आली आहे.ओबीसी आरक्षणाचा प्रश्न देखील कायम असल्याने तेथेही अनारक्षीत जागांचीच निवडणूक झालेली आहे. विधानसभेने ओबीसी आरक्षणाचा प्रश्न सुटत नाही तोवर राज्यातील स्थानिक स्वराज्य संस्थांच्या निवडणुका घेऊ नयेत असा प्रस्ताव संमत केला आहे. यामुळे नगरपालिकांच्या निवडणुका पुढे ढकलण्यात आल्याचे स्पष्ट झाले आहे.
नगरविकास विभागाने जीआर काढून या महिन्याच्या अखेरीस मुदत संपलेल्या नगरपालिका आणि नगरपरिषदांवर प्रशासक नेमण्यात येत असल्याची घोषणा केली आहे.
जिल्ह्यातील 12 नगरपालिका आणि प्रशासक असे आहेत – भुसावळ – उपविभागीय अधिकारी , अमळनेर – उपविभागीय अधिकारी , चाळीसगाव – मुख्याधिकारी , चोपडा – उपविभागीय अधिकारी , पाचोरा – उपविभागीय अधिकारी , पारोळा – मुख्याधिकारी , धरणगाव – मुख्याधिकारी , एरंडोल – मुख्याधिकारी , फैजपूर – मुख्याधिकारी , रावेर – उपविभागीय अधिकारी , सावदा – उपविभागीय अधिकारी , यावल – उपविभागीय अधिकारी .
जिल्ह्यातील या नगरपालिकांची मुदत 29 डिसेंबररोजी संपत आहे. 30 डिसेंबरपासून संबंधीत नगरपालिकांमधील नगराध्यक्ष आणि अन्य नगरसेवकांचे वर्चस्व समाप्त होणार असून आता प्रशासक राज सुरू होणार असल्याचे स्पष्ट झाले आहे.
