सांगली ( वृत्तसंस्था ) – महाविद्यालयीन युवकासोबत अनैसर्गिक संबंध ठेवत, त्याची क्लिप व्हायरल करण्याची धमकी देत खंडणी वसूल केल्याची धक्कादायक घटना सांगलीत उघडकीस आली आहे.
इस्लामपूर पोलीस ठाण्याचा हवालदार हणमंत देवकर याच्यावर इस्लामपूर पोलीस ठाण्यात गुन्हा दाखल करण्यात आल्याची माहिती उपविभागीय पोलीस अधिकारी कृष्णात पिंगळे यांनी दिली.
27 ऑक्टोबरला पहाटे तीन वाजता हणमंत देवकर आणि एक कर्मचारी इस्लामपूर येथील एका रस्त्यावर पेट्रोलिंग करत होते. त्यावेळी एक महाविद्यालयीन युवक मैत्रिणीला भेटून पुन्हा वसतिगृहात जात होता. तिथे पोलिस कर्मचाऱ्यांनी त्याला अडवले.
‘आता कोठून आलास? इथे काय करतोयस?’ अशी त्याच्याकडे विचारणा केली. युवकाने मी मैत्रिणीला भेटून येत आहे असे सांगितले. पोलिसांनी त्या युवकाकडून त्याचा फोन नंबर घेतला. 29 ऑक्टोबरला महाविद्यालयाच्या गेटजवळ येत हणमंत देवकर याने त्या युवकाला फोन करुन भेटायला येण्यास सांगितले.
सकाळी संबंधित युवक पोलिसांना भेटला. त्याच्याकडे पैशाची मागणी करत पैसे न दिल्यास प्रेम प्रकरण त्याच्या आणि मैत्रिणीच्या घरी सांगेन अशी धमकी दिली. त्यावर युवकाने मित्रांकडून चार हजार रुपये उसने घेऊन हणमंत देवकर याला दिले.
तेवढ्यावर न थांबता देवकर याने तरुणाला तुझ्या मैत्रिणीचा मोबाईल नंबर दे, तिला माझ्याबरोबर शारिरीक संबंध ठेवायला सांग, असे सांगितले. तरुणाने ती मुलगी चांगल्या घरातील आहे. असे सांगून तसे करण्यास स्पष्ट नकार दिला. त्यावर देवकरने तू तसं न केल्यास तुझ्याबरोबर शारिरीक संबंध ठेवेन, अशी धमकी दिली.
पोलिसाच्या पवित्र्याने संबंधित तरुण घाबरला. देवकरने त्याला त्याच्या वसतीगृहातील रुमवर नेले. रुमवर असलेल्या मित्राला दुसऱ्या रुममध्ये जाण्यास सांगितले. तिथे देवकरने त्या तरुणाशी अनैसर्गिक संबंध ठेवले आणि त्याची व्हिडीओ क्लिप तयार करुन तो तेथून निघून गेला.
21 नोव्हेंबरला दुपारी हवालदार देवकर याने पुन्हा त्या युवकास मोबाईलवर फोन करुन महाविद्यालयाच्या गेटवर बोलावून घेतले आणि शारिरीक संबंध ठेवण्याची मागणी केली. तसे न केल्यास मोबाईलमधील क्लिप दाखवून ती व्हायरल करण्याची धमकी दिली.
तरुणाने हा प्रकार आपल्या मित्रांना सांगून हवालदार देवकर याच्या विरोधात इस्लामपूर पोलिस ठाण्यात फिर्याद दिली. पोलिसांनी हवालदार देवकर याला अटक केली. हवालदार देवकर याच्यावर अनैसर्गिक संबंध ठेवणे, खंडणी, अश्लील क्लिप व्हायरल करणे, धमकावणे असे गुन्हे दाखल करण्यात आले आहेत.
