बीड ( प्रतिनिधी ) – बीड जिल्ह्यातील कुणाचेही डोके सुन्न करणाऱ्या बलात्काराच्या घटनेत गेल्या सहा महिन्यांत १६ वर्षांच्या मुलीवर तब्बल ४०० लोकांनी बलात्कार केल्याचा आरोप पीडित मुलीने केला आहे.
पीडितेने तक्रार दाखल करण्याचा प्रयत्न केल्यावर एका पोलिसाने देखील तिचे लैंगिक शोषण केले होते. ही पीडिता आता दोन महिन्यांची गरोदर आहे.
पीडितेने दाखल केलेल्या फिर्यादीत म्हंटले आहे की , “तिच्या आईचा काही वर्षांपूर्वी मृत्यू झाला नन्तर तिच्या वडिलांनी आठ महिन्यांपूर्वी तिचे लग्न लावून दिले. मात्र, पती आणि सासरच्या मंडळींनी तिला मारहाण आणि वाईट वागणूक दिली आणि छळ केला. त्यामुळे ती पळून गेली आणि वडिलांकडे राहायला आली. मात्र, वडिलांनी तिला परत घरात न घेतल्याने ती बीड जिल्ह्यातील अंबाजोगाई येथील बसस्थानकावर भीक मागायला गेली. यातूनच तिला लैंगिक शोषणाला सामोरे जावे लागले.”
बालकल्याण समितीला दिलेल्या निवेदनात ती म्हणाली, “माझ्यावर अनेकांनी अत्याचार केले आहेत. अंबाजोगाई पोलीस ठाण्यात तक्रार देण्यासाठी अनेकवेळा गेले, परंतु पोलिसांनी दोषींवर कोणतीही कारवाई केली नाही. त्याऐवजी, माझ्यावर एका पोलिसानेच अत्याचार केला.”
पीडितेने या आठवड्यात पोलिसांकडे तक्रार दिल्यानंतर, बालविवाह प्रतिबंध कायदा, पॉस्को आणि भारतीय दंड संहितेच्या बलात्कार आणि विनयभंगाच्या कलमांखाली गुन्हा दाखल करण्यात आला आहे. रविवारी बीडचे पोलीस अधीक्षक राजा रामासामी यांनी तीन जणांना अटक करण्यात आली आहे, असे सांगितले.
