अहमदनगर ( वृत्तसंस्था ) – सहा दिवसांपासून घरीच उपोषणाला बसलेल्या एसटी वाहकाच्या मृत्यू झाल्याची घटना नगरमध्ये घडली. विजय महादेव राठोड (वय 46 रा. बुर्हाणनगर ता. नगर, मुळ रा. वांगुज ता. आष्टी जि. बीड) असे या कर्मचार्याचे नाव आहे.
विजय राठोड हे कल्याण आगारात वाहक म्हणून कार्यरत होते. त्यांच्या मृत्यूस महामंडळ आणि शासन जबाबदार असल्याचा आरोप त्यांच्या मुलाने केला आहे. ते एसटीच्या सध्या सुरू असलेल्या आंदोलनात सहभागी होते.
एसटी महामंडळाचे राज्य सरकारमध्ये विलीनीकरण करण्याच्या मागणीसाठी सध्या राज्यभर संप सुरू आहे. राठोडही या संपात सहभागी झाले होते. त्यांनी नगर शहरातील तारकपूर येथील संपात सहभाग घेतला होता. सहा दिवसांपासून ते उपाशी होते. रविवारी ते नगरजवळील मिरावली पहाड येथे दर्शनासाठी गेले होते. तेथे त्यांना त्रास होऊ लागल्याने जिल्हा शासकीय रूग्णालयात दाखल करण्यात आले होते. तेथे त्यांनी शेवटचा श्वास घेतला.
विजय राठोड यांच्या मुलाने सांगितले कि, वडिलांचा पगार सात हजार रूपये झाला होता. दिवाळीचा बोनसही अडीच हजार रूपये मिळाला होता. लॉकडाऊन काळात चार महिने केलेल्या कामाचा मोबदलाही त्यांना मिळाला नाही. सात हजार रूपयात घर खर्च कसा चालणार या चिंतेत ते होते. सहा दिवसांपासून त्यांनी जेवणही घेतले नव्हते. त्यामुळे त्यांचा मृत्यू झाल्याचा आरोप मुलाने केला आहे.
