जळगाव ( प्रतिनिधी ) – नेहरू नगरातील ४० वर्षीय तरूणाने राहत्या घरात गळफास घेवून आत्महत्या केल्याची घटना रात्री उघडकीला आली एमआयडीसी पोलीस ठाण्यात अकस्मात मृत्यूची नोंद करण्यात आली आहे.
जतीन जयप्रकाश चांगरे (वय-४० , रा. सेंट टेरेसा शाळेसमोर, नेहरू नगर ) असे गळफास घेतलेल्या तरूणाचे नाव आहे. जतीन चांगरे पत्नी व दोन मुलांसह नेहरू नगरात वास्तव्याला होते . ते जिल्हा शासकीय वैद्यकीय महाविद्यालयात वार्ड बॉय .म्हणून नोकरीला होते . दिवाळी निमित्त त्याची पत्नी व दोन्ही मुले मनमाड येथे गेल्या होत्या. वडील जयप्रकाश चांगरे हे रेल्वेतील सेवानिवृत्त अधिकारी आहेत. ते नवल कॉलनी येथे राहतात.
पत्नी व मुले गावाला गेल्यामुळे जतीन घरी एकटाच होता. सोमवारी दुपारी २ वाजेपर्यंत ते जिल्हा रूग्णालयात कामावर होते. त्यानंतर ते घरी गेले. बुधवारी रात्री त्यांची पत्नी सुमित्रा ह्या मनमाड येथून घरी आल्या. त्यावेळी घराचा दरवाजा बंद होता. त्यांनी भावाच्या मदतीने घर उघडण्याचा प्रयत्न केला त्यावेळी दुसऱ्या मजल्यावर जतीन यांनी गळफास घेवून आत्महत्या केल्याचे उघडकीला आले. त्यांनी आत्महत्या करण्याचे कारण लगेच समजू शकले नाही. एमआयडीसी पोलीस ठाण्यात अकस्मात मृत्यूची नोंद करण्यात आली आहे. जतीनने दोन दिवसांपुर्वी आत्महत्या केली असावी असा अंदाज वैद्यकीय अधिकारी यांनी व्यक्त केला.
त्यांच्या पश्चात वडील जयप्रकाश चांगरे, हितेंद्र व खूशाल हे दोन भाऊ, पत्नी सुमित्रा, मुलगा प्रतिक आणि मुलगी कुंकुम असा परिवार आहे. आज सकाळी जिल्हा शासकीय वैद्यकीय महाविद्यालयात शवविच्छेदन करून मृतदेह नातेवाईकांच्या ताब्यात देण्यात आला.
