जळगाव ( प्रतिनिधी ) – मुक्ताईनगर तालुक्यात वढोदा जवळील जंगलात लुटीच्या उद्देशाने दोघांना बोलावुन जबर मारहाणीत कोल्हापुर येथील माजी सैनिकाची हत्या व एक जण गंभीर झाल्याची दुर्देवी घटना ५ नोव्हेंबररोजी घडली होती. तालुक्यातील हलखेडा येथील अजय दादाराव पवार व दादाराव हरबशी पवार यांना या गुन्ह्यात पोलिसांनी अटक केली असुन अन्य अज्ञात पाच-सहा फरार आरोपीचा शोध सुरू आहे.
जखमी अनिल निकम यांच्या मित्रांनी नांदुरा पोलिसांत दिलेल्या फिर्यादीवरून गुन्हा दाखल करण्यात आला होता.दोन दिवसांपुर्वीच संबंधित गुन्ह्यांचा तपास मुक्ताईनगर पोलिसांकडे वर्ग करण्यात आला पोलीस उपविभागीय अधिकारी विवेक लावंड व पोलीस निरीक्षक राहुल खताळ यांनी नांदुरा पोलीसांच्या मदतीने तपासाची चक्र वेगाने फिरवत आरोपी पकडले
प्राथमिक चौकशीनंतर मांडुळ साप तस्करीचे प्रकरण समोर आले असुन सोशल मीडियाचाही गैरवापर झाल्याचे आढळुन आले आहे. कोल्हापूर जिल्ह्यातील सावर्डे बुद्रुक येथील अनिल आनंदा निकम व माजी सैनिक प्रल्हाद शिवराम तायडे यांना हलखेडा येथील पवार नावाच्या व्यक्तीने फसवणुकीच्या उद्देशाने मांडुळ सापाचे आमीष दाखवुन नांदुरापर्यत येण्यास भाग पाडले. नांदुरापर्यत दुचाकी पाठवुन संबंधितांना वढोदा जंगलात आणुन आरोपी पवार यांच्यासह आणखी पाच-सहा जणांनी या दोघांना बेदम मारहाण केली.झाडाला उलटे टांगून केलेल्या मारहाणीत माजी सैनिक प्रल्हाद पाटील यांचा जागीच मृत्यु झाला तसेच अनिल निकम हे गंभीर जखमी झाले होते.आरोपी एवढ्यावर न थांबता मृतासह जखमी निकमला पुर्णा नदीच्या पुलावरून खाली टाकुन दिले होते.दरम्यान पाटील यांच्या एटीएम कार्डचा वापर करुन २१५०० रु.व आॅनलाईन २७००० व इतर अशी सर्व रक्कम मिळुन एक लाख सहा हजार पाचशे रुपये आरोपींनी लुटले असल्याचे समोर आले आहे.
या आदिवासी भागातील हलखेडा, जोंधनखेडा, लालगोटा, मधापुरी, वढोदा आदी परीसरात नागमणी, काळी हळद, मांडुळ सर्प (डबल इंजिन), पांढरे बिबे यासारख्या काल्पनिक वस्तुंचे आमिष दाखवून गर्भश्रीमंत व्यक्तीना अलगद जाळ्यात ओढले जाते.वेगवेगळ्या पद्धतीने वस्तु खरी असल्याचे भासवुन संबंधितांना परीसरात निर्जन स्थळी बोलावून पैशांसह मुद्देमालाची लुट केली जाते. एखादेवेळी जीवासही मुकावे लागते.
डोलारखेडा फाट्यासह मुख्य रस्त्याच्या कडेला पोलीस प्रशासनाकडुन अशा फसवणुकीपासुन सावधतेचा इशारा देणारे बॅनर लावलेले आहे मात्र तरीही सुशिक्षित लोक भुलपाथांना बळी पडत आहेत.
