जळगाव ( प्रतिनिधी ) – शहरातील नंदुरबारकर सराफ हे दुकान फोडून दागिने चोरी केल्याच्या गुन्ह्यात मोनुसिंग बावरी याला अटक केल्यानंतर त्याने व त्याच्या साथीदारांनी कोथळी (ता.मुक्ताईनगर) येथे घरफोडी केल्याचे उघड झाले होते. त्याच्या दोघं साथीदारांना पकडण्यात एमआयडीसी पोलिसांना यश आले असून त्यांना मुक्ताईनगर पोलिसांच्या ताब्यात देण्यात आले आहे.
जळगाव शहरातील कंजरवाडा परिसरातील नंदुरबारकर सराफ दुकानाचे कुलूप तोडून अडीच लाख रुपयांचे दागिने लंपास केल्याची घटना ३१ ऑक्टोबर रोजी घडली होती. तपास सुरु असतांना स्थानिक गुन्हे शाखेच्या पथकाने मध्यप्रदेशातील सतवास येथून चोरट्यास ताब्यात घेतले होते. त्याने मोनुसिंग बावरी याच्या मदतीने चोरी केल्याची कबुली दिली होती. एमआयडीसी पोलिसांच्या पथकाने मोनुसिंग जगदीशसिंग बावरी (रा. शिकलकरवाडा, तांबापुरा) याला शनिवारी मेहून (ता.मुक्ताईनगर) येथून अटक केली.
मोनुसिंग बावरी हा मुक्ताईनगर येथे मिळून आल्याने त्याने त्याच्या साथीदारांच्या मदतीने कोथळी येथे घरफोडी केल्याची गुप्त माहिती पोलीस निरीक्षक प्रताप शिकारे यांना मिळाली होती. एमआयडीसी पोलिसांनी सोमवारी सापळा रचून मोनुसिंग बावरी याचा भाऊ मोहनसिंग बावरी व सतवीरसिंग टाक (दोन्ही रा. शिरसोली नाका, तांबापुरा, जळगाव) यांना मेहरूण तलाव परिसरातून अटक केली.दोघा चोरट्यांना मुक्ताईनगर पोलिसांच्या ताब्यात देण्यात आले या तिनही चोरट्यांनी शुक्रवारी विनोद धोंडू शिंदे (रा. कोथळी, ता. मुक्ताईनगर) यांच्या घरात चोरी करून ४ लाख ८३ हजार १७० रुपयांचा मुद्देमाल लंपास केला होता.
एमआयडीसी पोलीस स्टेशनच्या पथकातील स फौ अतुल वंजारी, पो हे कॉ नितीन पाटील, पो ना इम्रान सय्यद, सुधीर सावळे, पो कॉ किशोर पाटील, गोविंदा पाटील, सचिन पाटील आदींनी सापळा रचून दोघांना ताब्यात घेतले.
