जळगाव ( प्रतिनिधी ) – राज्य व केंद्र शासनाचे सायकलिंगकरिता निपुणता केंद्र कार्यान्वित आहे. ज्या खेळाडुंची जन्मतारीख 1 जानेवारी, 2007 ते 31 डिसेबर, 2009 दरम्यान आहे, त्यांचा तज्ञ समितीमार्फत समक्ष गुणानुक्रम देवून प्रवेश निश्चित केला जाणार आहे.जिल्हास्तरावर 8 नोव्हेंबररोजी सकाळी श्री. छत्रपती शिवाजी महाराज जिल्हा क्रीडा संकुल येथे नैपुण्य चाचण्यांचे आयोजन करण्यात आलेले आहे.
जिल्हास्तरावर मुलांकरिता 1600 मीटर धावणे व मुलीसाठी 800 मीटर धावणे तसेच दोघांकरिता उभी लांब उडी, उभी उंच उडी व खेळाडुंची उंची अशा चाचण्यामधून गुणानुक्रमे प्रथम 2 मुले व 2 मुलींची निवड करुन राज्यस्तरावर चाचणीकरिता पात्र ठरतील.
जे खेळाडू सायकलिंग खेळात जिल्हाकडून राज्य व राष्ट्रीय स्तरावर सहभागी झालेले आहेत अशा खेळाडूंना थेट राज्यस्तरावर क्रीडा नैपुण्य चाचण्यांकरिता पाठविण्यात येणार आहे. खेळाडुंनी राज्य व राष्ट्रीय स्पर्धेतील क्रीडा प्राविण्य प्रमाणपत्रांची छायांकित प्रत व मुळ प्रत सोबत न्यावयाची आहे. राज्यस्तरावर पात्र ठरणाऱ्या व थेट निवड झालेल्या खेळाडुंनी 10 नोव्हेंबररोजी सायंकाळी 5.00 वाजेपर्यंत शिवछत्रपती क्रीडापीठ, म्हाळुंगे-बालेवाडी, पुणे येथे उपस्थित रहावे. त्यांच्या चाचण्या 11 नोव्हेंबररोजी सकाळी सायकलिंग वेलोड्रॉम येथे घेण्यात येतील.
जिल्हास्तरावर सायकलिंगच्या नैपुण्य चाचण्यांकरिता इच्छुक खेळाडुंनी आधारकार्ड / जन्मदाखलासह इयत्ता, पत्रव्यवहाराचा पत्ता, संपर्क क्रमांकसह उपस्थित रहावे. अधिक माहितीसाठी मिनल थोरात (राज्य क्रीडा मार्गदर्शक) 8625946709 यांचेशी संपर्क साधावा, असे आवाहन जिल्हा क्रीडा अधिकारी मिलिंद दिक्षित यांनी केले आहे.
