जळगाव (प्रतिनिधी) – केंद्रीय मंत्री नारायण राणे यांच्या अटकेनंतर जमावबंदीचे उल्लंघन करून आंदोलन करतांना भाजप कार्यकर्त्यांना धक्काबुक्की केल्याप्रकरणी शिवसेनेच्या पदाधिकार्यांवर रात्री उशिरा जळगाव शहर पोलीस स्टेशनमध्ये गुन्हा दाखल करण्यात आला आहे.
केंद्रीय मंत्री नारायण राणे यांनी मुख्यमंत्र्यांवर आक्षेपार्ह वक्त्यव्य केल्याप्रकरणी संपूर्ण महाराष्ट्रात शिवसेनेचे कार्यकर्ते व पदाधिकारी यांनी महाराष्ट्रातल्या भाजपच्या कार्यालयावर दगड फेक करत भाजपच्या कार्यकर्त्यांबरोबर राडा झाला होता. या अनुषंगाने जळगाव शहरातील शिवसेनेच्या महापौर जयश्रीताई महाजन यांच्या तक्रार अर्जावरून केंद्रीय मंत्री नारायण राणे यांच्यावर गुन्हा दाखल झाल्यानंतर शहरातील शिवसैनिकांनी आक्रमक पवित्रा घेत आंदोलन केले. आंदोलनाच्या दरम्यान शिवसेनेचे पदाधिकारी व कार्यकर्ते भाजप कार्यालयात शिरले. त्यांनी तेथे कोंबड्या फेकून उपस्थितांना धक्काबुक्की केली. या प्रकारची महानगराध्यक्ष दीपक सूर्यवंशी यांनी निषेध करून गुन्हा दाखल करण्याचा इशारा दिला होता.
यानंतर रात्री उशिरा जळगाव शहर पोलीस स्टेशनमध्ये शिवसेनेच्या २५ पदाधिकार्यांवर जमावबंदीचे उल्लंघन आणि धक्काबुक्की केल्या प्रकरणी गुन्हा दाखल करण्यात आला आहे. यात महापौर आणि उपमहापौरांसह अन्य पदाधिकार्यांचा समावेश आहे.
