जळगाव (प्रतिनिधी) भाईदास हिराचंद रायसोनी पतसंस्थेच्या घोटाळ्या प्रकरणी अखेर मुख्य संशयित आरोपी सुनील झंवर याला आर्थिक गुन्हे शाखेच्या पथकाने नाशिक येथून आज सकाळी साडेदहा वाजेच्या सुमारास अटक केली असून त्याची वैद्यकीय तपासणी करून त्याला पुण्याकडे घेऊन पोलीस पथक रवाना झाले आहे. गेल्या अनेक महिन्यांपासून फरार असलेल्या सुनील झंवर याला अटक केल्याने या घोटाळ्याचे धागेदोरे कुणापर्यंत जाऊन पोहचले आहे याचा उलगडा होणार आहे. दरम्यान पोलिसांचे पथक दहा दिवसापासून झंवरच्या मागावर होते. त्यानंतर रात्रभर सापळा रचल्यानंतर आज सकाळी १०:३० वाजता त्याला अटक करण्यात आली.
आर्थिक गुन्हे शाखेच्या उपायुक्त भाग्यश्री नवटके यांनी आपल्या अधिकारी आणि कर्मचाऱ्यांचे पथक तयार केले. सुनील झंवर पोलिसांना गुंगारा देत होता. आधी अहमदाबाद त्यांनतर उज्जेन आणि काल रात्री तो नाशिक येथे पोहचला. नाशिकला पोहोचल्याबरोबर पोलिसांनी घराला सर्व बाजूने घेरून घेतले. झंवरच्या अटकेचे सर्व मार्ग बंद केल्यानंतर आज सकाळी १० :३० वाजता पोलिसांनी त्याला अटक केली. विशेष म्हणजे अटक करण्यापूर्वी ज्यावेळी झंवर गॅलरीत आला. त्यावेळी त्याचे फोटो नकळत काढून तोच सुनील झंवर असल्याचे समजताच पथकाने त्याला ताब्यात घेतले. नाशिक येथे वैद्यकीय तपासणी केल्यानंतर आर्थिक गुन्हे शाखेचे पथक झंवरला पुण्याला घेऊन रवाना झाले आहेत.
