नंदुरबार (वृत्तसंस्था) – नंदुरबार येथील रणमाळ सिंदिदिगर रस्त्यावर प्रवासी वाहतूक करणारी बोलेरो गाडी दरीत कोसळून भीषण अपघात झाला आहे. या अपघातात दहा जणांचा दुर्दैवी मृत्यू झाला आहे . मृतांची संख्या वाढण्याची शक्यता आहे.
बोलेरो गाडी दरीत कोसळल्याने बचाव आणि मदत कार्याला मोठा अडथळा येत आहे. स्थानिकानी मदतकार्यासाठी धाव घेतली आहे. तसेच अपघाताची माहिती मिळताच बघ्यांची गर्दी देखील वाढली आहे. या ठिकाणी कोणत्याही मोबाईल कंपनीचे नेटवर्क नसल्याने माहिती आणि बचाव कार्यास अडचण येत आहे.
मिळालेल्या माहितीनुसार रविवारी दुपारी मध्यप्रदेशच्या बडवानी जिल्ह्यातील एक भजनी मंडळ नंदुरबार जिल्ह्यात शहादा तालुक्यातील चिखली पुनर्वसन येथे भजनाच्या कार्यक्रमासाठी येत होते. हे भजनी मंडळ आणि काही प्रवासी यांचा समावेश असलेली क्रुझर गाडी सिंदिदिगर घाटातून घेऊन जात असताना रविवारी सायंकाळच्या सुमारास हा अपघात घडला. गाडीतील प्रवासी अक्षरश: फेकले गेले. त्यापैकी10 जणांचा जागीच मृत्यू झाला आहे. तर 4 जण गंभीर जखमी आहेत.
स्थानिक पोलीस प्रशासन गावकऱ्यांच्या मदतीने बचावकार्य करत आहेत. पोलीस अधिक्षकांसह मोठा फौजफाटा घटनास्थळी दाखल झाला आहे.या अपघातात मृतांची संख्या वाढण्याची शक्यता आहे.
