जळगाव –अजिंठा शासकीय विश्रामगृहात आमदार प्रणिती शिंदे यांनी घेतलेल्या काँग्रेस पक्षाच्या बैठकीत, कोरोनाच्या पार्श्वभूमीवर जिल्हाधिकाऱ्यांनी लागू केलेल्या नियमांचे उल्लंघन करण्यात आले. यामुळे काँग्रेस आमदार शिरीष चौधरी, जिल्हाध्यक्ष अॅड. संदीप पाटील, माजी खासदार डॉ. उल्हास पाटील यांच्यासह २० ते २५ काँग्रेस पदाधिकारी आणि कार्यकर्त्यांविरुद्ध रामानंद नगर पोलीस स्टेशनला गुन्हा दाखल करण्यात आला आहे.
जळगाव जिल्ह्याच्या दौऱ्यावर १५ मे रोजी आ. प्रणिती शिंदे आल्या होत्या. त्यांच्या उपस्थितीत अजिंठा शासकीय विश्रामगृहावर बैठक घेण्यात आली. मात्र यावेळी पोलिसांची कुठलीही परवानगी न घेता काँग्रेसच्या पदाधिकाऱ्यांनी गर्दी करून फिजिकल डिस्टेनसिंगचे पालनही न केल्याचे आढळून आले होते.
यांच्यावर झाला गुन्हा दाखल
रावेरचे काँग्रेस आमदार शिरीष चौधरी, पक्षाचे जिल्हाध्यक्ष अॅड. संदीप पाटील, माजी खासदार डॉ.उल्हास पाटील, युवक जिल्हाध्यक्ष हितेश पाटील, महिला आघाडीच्या जिल्हाध्यक्ष सुलोचना वाघ, माजी अध्यक्ष उदय पाटील, जिल्हा परिषदेचे गटनेते प्रभाकर सोनवणे, श्याम तायडे यांच्यासह इतर २० ते २५ पदाधिकारी व कार्यकर्ते यांचा त्यात समावेश आहे.
भादवि कलम १८८, २६९ आपत्ती व्यवस्थापन अधिनियम २००५ चे कलम ५१ (ब) महाराष्ट्र पोलीस अधिनियम १९५१ चे कलम ३७(१) (३) चे उल्लंघन १३५ प्रमाणे गुन्ह्याची नोंद झालेली आहे. तपास हवालदार सुनील पाटील करीत आहे.
