पाचोरा;- पाचोरा-भडगाव तालुक्यात येत्या १५ दिवसात प्रत्येकी एक ऑक्सिजन प्लांटची निर्मिती करण्यात येणार असून कोरोना बाधित रुग्णांना याचा मोठ्या प्रमाणात लाभ मिळणार आहे.अशी माहिती आ. किशोर पाटील यांनी बोलतांना दिली.
पाचोरा – भडगाव तालुक्यात कोरोना व्हायरसचा दिवसेंदिवस प्रभाव वाढतच असून वाढत्या रुग्ण संख्येमुळे अनेक रुग्णांना ऑक्सीजन अभावी जीवनास मुकावे लागत आहे. दिवसेंदिवस ऑक्सिजनचा तुटवडा पाहता पाचोरा मतदार संघात ऑक्सिजनची निर्मिती होऊन दोन्ही तालुक्यातील रुग्णांना त्याचा फायदा होण्यासाठी आमदार किशोर पाटील यांनी तातडीने जिल्हा अधिकारी अभिजित राऊत यांच्याशी संपर्क साधून पाचोरा – भडगाव तालुक्यातील ऑक्सीजन प्लांट निर्मितीबाबत सकारात्मक प्रतिसाद मिळविला आहे. यात पाचोरा तालुक्यासाठी शहरातील ग्रामीण रुग्णालय जवळील रुग्णवाहिणीच्या शेडमध्ये तर भडगाव येथे प्राथमिक आरोग्य केंद्राजवळील रिकाम्या जागेत येत्या १५ दिवसात ऑक्सिजनची निर्मिती केली जाणार असल्याने दोन्ही तालुक्यांसाठी होत असलेल्या ऑक्सीजन निर्मितीमुळे रुग्णांना मोठा दिलासा मिळणार आहे.
पाचोरा शहरातील ग्रामीण रुग्णालया लगत २४ तासात ७८ सिलेंडरची निर्मिती करणारा व भडगाव येथील प्राथमिक आरोग्य केंद्रालगत ७८ सिलेंडरची निर्मिती करणारा प्लांट सुरू करण्याची योजना हाती घेतली आहे. यासाठी लागणाऱ्या दोन्ही प्लान्टसाठी आमदार किशोर पाटील यांच्या आमदार फंडातून १ कोटी रुपये निधी खर्च केला जाणार आहे. शनिवारी दुपारी आमदार किशोर पाटील उपविभागीय अधिकारी राजेंद्र कचरे पाटील, तहसिलदार कैलास चावडे, तालुका वैद्यकीय अधिकारी डॉ. समाधान वाघ, ग्रामीण रुग्णालयाचे अधीक्षक डॉ. अमित साळुंखे , स्वीय सहायक राजेश पाटील यांनी पाहणी केली. दोन्ही तालुक्यातील या प्लान्टमुळे शासकीय रुग्णालयात उपचार घेऊ पाहणाऱ्या गोरगरीब रुग्णांना चांगला फायदा मिळणार आहे. आदल्या दिवशीच लोहटार येथे पंचायत समितीचे माजी सभापती सुभाष पाटील यांनी ६० हजार रुपये खर्च करून ६ ऑक्सीजन बेड सुरू केल्याने परिसरातील नागरिकांना ही त्याचा लाभ मिळणार आहे.
