जळगाव;- हॉटेल कमल पॅरेडाईज येथे लग्नाच्या समारंभातून अज्ञात चोरट्यांनी नवरीचे सोन्याचे दागिने व अडीच लाख रूपये रोकड असा एकुण सुमारे १६ लाख १० हजार रूपये किंमतीचा मुद्देमाल अवघ्या १५ मिनीटात लंपास केल्याची घटना सोमवारी दुपारी उघडकीस आली. चोरटा सीसीटीव्हीत कैद झाला असून शनीपेठ पोलीस ठाण्यात गुन्हा नोंदविण्यात आला आहे.
युवराज विश्वनाथ नेमाडे (वय-५३) रा. बाविसे गल्ली, रावेर यांच्या मुलीचे लग्न जळगाव-भुसावळ रोडवरील हॉटेल कमल परेडाईज येथे सोमवारी १५ फेब्रुवारी रोजी आयोजित करण्यात आले होते. त्यानिमित्ताने त्यांचे नातेवाईकांसह आणि परिवारासह लग्नाला आलेले होते. दुपारी १.४३ ते २ वाजेच्या दरम्यान अज्ञात चोरटे यात एक व्यक्ती आणि दोन लहान मुलांनी लग्न समारंभात वऱ्हाडी व्यस्त असतांना पिशवीतून अडीच लाख रूपयांची रोकड, १ लाख रूपये किंमतीची दोन तोळ्याची सोन्याची दोन चैन, ५५ हजार रूपये किंमतीची सोन्याची अंगठी, ५५ हजार रूपये किंमतीची १ तोळ्याची सोन्याची चैन, ४ लाख रूपये किंमतीचा सोन्याचा हारसेट त्यात कानातील रिंगा, अंगठी, ब्रेसलेट, ४२ हजार रूपये किंमतीचे सोन्याचे मंगळसुत्र, ४ लाख रूपये किंमतीच्या सोन्याच्या बांगड्या, ७० हजार रूपये किंमतीचे सोन्याचे झुमके, ४२ हजार रूपये किंमतीचा सोन्याची गॅम वजनाची बिंदी, ४२ हजार रूपये किंमतीची ८ ग्रॅम वजनाचे कानातील लोमटे, १ लाख १२ हजार रूपये किंमतीचे सोन्याचे मोराचे पॅन्डल असलेले पैंडल असा एकुण १६ लाख १० हजार रूपये किंमतीचा मुद्देमाल लंपास केला आहे. युवराज विश्वनाथ नेमाडे हे शेतकरी असून व्यापारी देखील आहे.
याप्रकरणी युवराज नेमाडे यांच्या फिर्यादीवरून अज्ञात तिघांवर शनीपेठ पोलीस ठाण्यात गुन्हा दाखल करण्यात आला आहे. घटनास्थळी सहाय्यक पोलीस अधिक्षक कुमार चिंथा, पोलीस निरीक्षक विठ्ठल ससे यांनी धाव घेवून घटनेची माहिती जाणून घेतली तसेच हॉटेल कमल पॅरेटाईज येथील सीसीटीव्हीत कैद झालेल्या तिन जणांचा शोध घेण्याचे काम सुरू आहे.
